Kukësi, një ganez nga Prishtina për mbrojtjen
Kërkesat e afrikanit, më të larta se oferta e klubit
Kukësi është në alarm për mbrojtjen. Me largimin e Ardian Cuculit, Simon Rrumbullakut si dhe mungesa e dakordësisë me kapitenin Ylli Shameti, te verilindorët janë vënë në lëvizje e kërkojnë me çdo kusht dublimin e këtyre dy roleve. Për krahun e majtë verilindorët kanë në dispozicion Emiljano Mustën dhe Faton Xhemailin, por Musta më shumë shikohet si mesfushor i majtë, e krahu nuk mund t’i besohet Xhemailit, jo për shkak të talentit, por të moshës dhe eksperiencës. E në këtë situatë, verilindorët janë hedhur në sulm për një mbrojtës të majtë të mirëfilltë dhe me eksperiencë. Të gjitha kushtet që verilindorët kanë vendosur dhe kërkojnë, i plotëson mbrojtësi 27-vjeçar ganez. Gazeta mëson ekskluzivisht se drejtuesit e Kukësit po negociojnë dhe janë shumë pranë marrëveshjes me ish- mbrojtësin e Prishtinës, Abdul Bashiru. Mbrojtësi i majtë luajti për dy sezone në radhët e kryeqytetasve të Prishtinës në kampionatin kosovar dhe performancat e tij kanë qenë të mira. Ai prej rreth 2 javësh ka ndërprerë bashkëpunimin me Prishtinën, ku vetë klubi kryeqytetas dhe lojtari u shprehën për ndërprerjen me dëshirë të kontratës dhe tashmë 27vjeçari është futbollist i lirë. Në këto kushte, drejtuesit e Kukësit
kanë biseduar dhe i kanë bërë ofertën e tyre mbrojtësit, të cilit i pëlqen ideja të luajë në kampionatin shqiptar, e aq më tepër me një klub pretendent si Kukësi. Tashmë mbetet për t’u parë se çfarë do të ndodhë, por natyrisht që kërkesat e mbrojtësit kanë qenë më të larta se oferta e klubit verilindor,
por gjasat janë që të gjendet gjuha e përbashkët. Bashiru është 27 vjeç, ka lindur më 17 prill 1992 në Akra të Ganës, luan në pozitën e mbrojtësit të majtë. Bashiru para se të militonte për dy vite me klubin e Prishtinës ka luajtur në skuadrën Dreams FC dhe Bechem United në Ganë. Ai
ka qenë pjesë dhe e klubit të njohur egjiptian, Ismaily. Mbrojtësi i majtë ka luajtur 71 takime me Prishtinën në kampionatin kosovar të futbollit në dy sezone. Futbollisti ka bërë paraqitje shumë të mira në miqësore, sidomos me Tiranën sezonin e shkuar, gjatë miqësores së verës.