Vangjeli: Faleminderit Korçë, te bardheblutë vij për trofe
Klubi kryeqytetas pret të zyrtarizojë edhe afrimin e Andi Lilës
Kristi Vangjeli është futbollisti më i ri i Tiranës. Klubi bardheblu ka zyrtarizuar afrimin e mbrojtësit të djathtë, i cili do të jetë pjesë e Tiranës në 2019-2020. Futbollisti, i cili ka qenë deri dje lojtar i Skënderbeut, ku ka dalë kampion dhe tani po shijon një aventurë në Australi, do të jetë në kryeqytet në fund të muajit gusht. "Kristi Vangjeli është zyrtarisht bardheblu. Mbrojtësi korçar ka nënshkruar marrëveshjen që e bën pjesë të Tiranës për një sezon. Vangjeli vjen si një përforcim me shumë vlera për skuadrën bardheblu. Ish-futbollisti i Skënderbeut do t'i bashkohet Tiranës në ditët e fundit të muajit gusht", shkruante klubi bardheblu.
KONTRATA - Tirana ka saktësuar se Vangjeli do të jetë një vit bardheblu. Me ardhjen e Vangjelit në ekip bëhen tre futbollistë që luajnë në krahun e djathtë, së bashku me Kërçikun dhe Dokën. Vangjeli mund të luajë fare mirë edhe në krahun e majtë të mbrojtjes dhe konsiderohet një futbollist i gjithanshëm.
REAGIMI - Pas zyrtarizimit të kalimit të Vangjelit, ishte vetë Kristi që në profilin e tij në "Instagram" falënderoi gjithë popullin e Korçës dhe kërkoi që te Tirana ta mbyllë sezonin me trofe. "Faleminderit Korça ime për këto 5 vite të mrekullueshme! Së bashku fituam gjithçka dhe këto vite do mbeten të paharruara, jo vetëm për ne që ishim pjesë e suksesit, por për gjithë ambientin sportiv. Tani gati për një tjetër aventurë. I kënaqur që te Tirana do të gjej shumë miq të mirë, por mbi të gjitha një klub të etur për trofe", shkruante Kristi Vangjeli.
PRAPASKENAT - Kristi Vangjeli ishte duke folur me Ardjan Takajn për një rikthim te Skënderbeu. Ai e përfundon aventurën e shkurtër me Adelaide Olimpik në fund të muajt gusht dhe po kërkonte që të sistemohej në një klub shqiptar derisa të mund të rregullojë të gjitha letrat për të shkuar familjarisht në Australi. Qëllimi i tij ishte të rikthehej te Skënderbeu. Parimisht presidenti i Skënderbeut dhe mbrojtësi 33-vjeçar kishin rënë dakord, por tani situata ka ndryshuar plotësisht te klubi korçar. Për të synuar lart, duhen disa kampionë. Osmani dhe Vangjeli e kanë këtë mendësi. Mësohet se klubi bardheblu e ka bindur për një pagë 3500 euro në muaj. Po kështu, Tirana pret zyrtarizimin edhe të Andi Lilës, i cili do të jetë përforcimi i radhës i skuadrës bardheblu. Edhe Lilën bëhet fjalë për një rikthim te Tirana.