Efenberg: Dortmundi, një kërcënim për Bajernin
Ish-kapiteni i Bajernit të Mynihut, Shtefan Efenberg, ka folur për “Sport 1” ku ka analizuar skuadrën e Bajernit dhe Dortmundit. Sipas Efes, verdhezinjtë do të jenë skuadra për t’u mundur.
Më në fund do të nisë Bundesliga, por më parë luhet Kupa e Gjermanisë, sa do ta ndiqni?
Kupa është një mundësi e mirë për të shkuar në Europë. Me pesë ndeshje mund të jesh në Berlin dhe nga aty në Europa Ligë. Më ka ngelur peng finalja e humbur ndaj Bremenit në Berlin në 1999-ën.
Si do ta përshkruanit fitoren 2-0 në Superkupë të Dortmundit?
Ishte një fitore e madhe. Mendoj se ata janë përmirësuar shumë në këtë sezon. Meritë për këtë ka edhe sistemi i lojës që përdor trajneri Lusien Favre. Sulmet e shpejta dhe zotërimi i shpeshtë i topit e kanë bërë skuadrën e Borusias shumë të rrezikshme. Ata do të jenë një rrezik për çdo skuadër në Bundesligë, përfshi edhe Bajernin. Por ajo që duhet të kenë parasysh është bërja mirë e llogarive. Kampionati është i gjatë dhe forcat duhen ruajtur deri në fund. Në sezonin e kaluar kjo gjë mungoi. Pas një faze të parë perfekte, Borusia u shpërfytyrua në të dytën duke humbur vendin e parë.
Po Bajerni sa të vështirë do ta ketë?
Nga kjo që thashë më sipër mund ta mendoni se Bajerni do ta ketë jo të lehtë për të mbrojtur titullin. Merkatoja e tyre ka qenë e mirë, po jo aq sa duhet. Ata janë forcuar vetëm në repartin e mbrojtjes. Por problemi i vërtetë qëndron te krahët e sulmit. Me Sanenë të dëmtuar, situata bëhet e komplikuar për bavarezët që në këto 3 javë duhet të gjejnë një zëvendësues.
Të rikthehemi te Kupa, mendoni se do të ketë surpriza?
Nuk besoj. Do të kualifikohen të gjitha skuadrat favorite, nga Bajerni, Leverkusen dhe Shalke. Në turet e tjera sfidat do të jenë më interesante, pasi numri i skuadrave do të pakësohet.