Ozil dhe Kolashinac frenohen nga policia, mungojnë me Njukasëllin

Shkaqe sigurie, dy yjet e Arsenalit nuk grumbullohen

Kuraja e treguar nga Sead Kolashinac duke përballuar grabitësit e armatosur me pistoleta dhe me thika, vetëm me duar, më 25 korrik, bëri xhiron e uebit në të gjithë botën. Ai i kishte dalë në mbrojtje shokut të tij të skuadrës, Mesut Ozil, dhe vetëm një ditë pas këtij sulmi të frikshëm, ata dolën së bashku në “Facebook” duke postuar: “Më duket se nuk kemi asnjë gërvishtje”. Gjithsesi, ajo pasdite e çmendur, ku dy persona tentuan që t’i vidhnin fuoristradën 150 mijë dollarëshe Mesut Ozilit duket se nuk ka përfunduar me kaq, por me një urdhër të prerë nga krerët e policisë. Edhe pse mund të duket absurde, strukturat shtetërore i kanë urdhëruar Arsenalit që të mos i grumbullojë dy yjet e tyre, si masë sigurie për dy lojtarët në fjalë. Fakti që dy keqbërësit nuk kanë përfunduar ende në pranga, policia mendon se prezenca e Kolashinacit dhe Ozilit në transfertën me Njukasëllin mund të sjellë rreziqe, prandaj për të mos rrezikuar, klubi i “topçinjve” ka pranuar ftesën e policisë dhe ka vendosur që të mos i grumbullojë dy futbollistët për ndeshjen e pasdites së nesërme. “Shëndeti dhe mirëqenia e futbollistëve tanë dhe familjeve të tyre është prioriteti i klubit të Arsenalit. Vendimi për të mos grumbulluar Mesutin dhe Seadin është marrë së bashku me ata, pas ftesës që na ka bërë policia. Do t’u japim futbollistëve tanë dhe policisë të gjithë suportin e mundshëm”, shkruhej në komunikatën e Arsenalit. Ndërkohë, trajneri Unai Emeri, përveç Ozilit dhe Kolashinacit mund të mos ketë në dispozicion për transfertën me Njukasëllin as blerjen e re 80 milionë euroshe, Nikolas Pepe. Sulmuesi nuk është ende në formën e tij maksimale, si rrjedhojë e pushimeve të pakta që ka kryer, pas pjesëmarrjes në Kupën e Afrikës, me Bregun e Fildishtë.