Reagon FSHB: Kombëtarja po trajtohet për turp
“Kjo nuk ndodh në asnjë vend të botës, s’jemi qiraxhinj”
Pasditja e së enjtes shënoi një nga faqet më të turpshme në historinë e sportit shqiptar, ku Kombëtarja e basketbollit për meshkuj nuk u lejua të stërvitej në sallën sportive “Feti Borova”. Kuqezinjtë e trajnerit Bilali duhet të kryenin seancën e fundit të stërvitjes, në kuadër të ndeshjes paraeliminatore “Eurobasket 2021”, ndaj Danimarkës, sfidë që do të zhvillohet sot në orën 15: 30 në Kopenhagen. Por kjo stërvitje nuk u zhvillua pasi sallës sportive iu vendos dryni. Ashtu sikurse ishte shprehur, Federata Shqiptare e Basketbollit doli dje me një deklaratë zyrtare për këtë çështje. Ja dhe qëndrimi i FSHB-së:
DEKLARATA - “Episodi i paprecedent i ditës së djeshme kur ekipit kombëtar të basketbolli për meshkuj iu mbyllën dyert e sallës sportive të Lojërave me Dorë “Feti Borova” në Parkun Olimpik të Tiranës, duke i mohuar edhe mundësinë për të kryer seancën e fundit stërvitore, na ka indinjuar pamasë, si federatë, por edhe si komunitet i këtij sporti. Preteksti dhe presioni i përdorur nga
Agjencia e Parqeve dhe Rekreacionit për nënshkrimin e një kontratë – pagese nuk duhej kurrsesi të vendoste mbylljen e dyerve për ekipin kombëtar shqiptar. Duhet theksuar këtu se gjatë përurimit të sallës në ditët e para të qershorit të 2017-ës, është thënë publikisht nga drejtuesit e qeverisë shqiptare, por edhe të pushtetit vendor, se kjo sallë do të ishte shtëpia e sportit dhe shtëpia e ekipeve kombëtare. Kjo është lehtësisht e verifikueshme, mjafton t’u referoheni kronikave të kohës. Për këtë arsye e gjejmë plotësisht të pakuptimtë dhe absolutisht të papranueshme përpjekjen për të imponuar një tarifë për stërvitjet apo ndeshjet e ekipeve përfaqësuese të vendit, sepse nuk mundet të konsiderohet qeraxheshë Kombëtarja shqiptare në vendin e vet. Federata Shqiptare e Basketbollit është e ndërgjegjshme dhe i respekton ligjet dhe legjislacionin në fuqi dhe për këtë arsye, ne i kemi bërë Bashkisë së Tiranës, nëpërmjet Agjencisë së Parqeve dhe Rekreacionit, pagesat për zhvillimin në këtë sallë sportive të fazës finale të Ligës Ballkanike në basketboll për meshkuj, por edhe të Divizionit C të kampionatit europian të basketbollit për meshkuj për nën 16-vjeçarët, edhe pse të dyja këto veprimtari ishin më tepër çështje të përfaqësimit të Shqipërisë në arenën sportive ndërkombëtare sesa çështje komerciale. Theksojmë këtu se këto pagesa kanë gllabëruar 10% të gjithë buxhetit vjetor të Federatës Shqiptare të Basketbollit të akorduar nga buxheti i shtetit. Por FSHB-ja nuk mund të pranojë që Kombëtarja të trajtohet si çështje komerciale, pasi nuk është kurrsesi e tillë, por është çështje e përfaqësimit
të vendit, sepse ajo përfaqëson flamurin, ngjyrat dhe himnin kombëtar. Për këtë arsye, e gjejmë të pavend imponimin e kësaj pagese për ekipin kombëtar dhe të turpshme mbylljen e dyerve për ekipin kombëtar, një veprim i paprecedent që ka ardhur në fakt pas disa tentativave të mëparshme të ngjashme. Theksojmë se në asnjë vend të botës, ekipi kombëtar i basketbollit nuk paguan për stërvitjet e tij dhe kjo e bën ngjarjen e së enjtes pasdite të paprecedent dhe të turpshme. Për më tepër, është e pamendueshme që një sallë sportive
që u përurua pikërisht me një ndeshje basketbolli, e për më tepër me një ndeshje që përçoi idenë e unitetit mbarëkombëtar, pasi veteranët e Shqipërisë u përballën me ata të Kosovës, e për më tepër një sallë sportive që mban emrin e njërit prej ‘baballarëve’ të basketbollit shqiptar si Feti Borova, t’i mbyllë dyert ekipit kombëtar të basketbollit. Besoj se këto fakte flasin më shumë se gjithçka dhe ne bëjmë thirrje për reflektim”, shkruhet në deklaratën zyrtare të bërë nga Federata Shqiptare e Basketbollit.