Stërvitje që “pa gdhirë”, ekipi pret shpërblimin 200 mln lekë

Klubi pritet që t’i ndajë në... një moment të dytë

Pritjes 26-vjeçare i erdhi fundi te Partizani. Ishte 12 maji kur të kuqtë u kurorëzuan kampionë të Shqipërisë, duke marrë kështu titullin e 16- të në histori. E megjithatë, duket se pritja nuk po u ndahet “demave”. Këtë herë po presin shpërblimin e famshëm që u është premtuar nga klubi. Ishin jo pak, por plot 200 milionë lekë (të vjetër) që duhet të shpërndaheshin për atë arritje. Edhe pse kanë kaluar afro 3 muaj nga sigurimi i trofeut më të rëndësishëm në vend, paratë nuk i kanë ndarë ende. Burime të sigurta për “Panorama Sport” konfirmojnë se të paktën deri dje asnjë nga futbollistët nuk e ka marrë “hisen” e tij. Ndonëse janë interesuar pranë drejtuesve, këta të fundit kanë garantuar që do të jepen në vazhdim. Por nuk kanë dhënë afat, thjesht kanë deklaruar se do të jepen në një moment të dytë. Ka zëra që kjo gjë të ndodhë edhe në çastin kur UEFA të depozitojë në llogarinë e klubit paratë për pjesëmarrjen në Champions League dhe Europa League (shumë që shkon diku të 800 mijë eurot, përfshi edhe të drejtën televizive dhe shpërblimin që jep FSHF-ja për

titullin), megjithatë mbetet për t’u konfirmuar në vazhdim se çfarë do të ndodhë. Kujtojmë se shpërblimi ishte parashikuar për 100 mijë euro, por emocionet e festës bënë që presidenca ta “lironte” dorën, duke shtuar edhe 70 mijë euro të tjera (që të konvertuara në vlerën tonë

monetare, shkojnë në 200 milionë lekë). Drejtuesit mbetën më shumë se të kënaqur nga protagonistët e titullit kampion të Kategorisë Superiore, ndaj rritën ndjeshëm edhe premion. E vetmja gjë që lojtarët dhe stafi që kontribuoi në atë arritje presin janë... paratë.