Fiksimi për titullin, Tirana tenton edhe Kristal Abazajn
Andi Lila gjithnjë e më pranë, gati rikthimi te kryeqytetasit pas tetë vitesh
Tirana tenton të afrojë në ekip edhe Kristal Abazajn. Lëvizja më e fundit e presidencës bardheblu është marrja borxh e lojtarit nga Anderlehti. Skuadra e Tiranës duket se ka nisur tratativat me belgët. Qëllimi është ta marrë në ekipin e këtij sezoni. Formula është shumë e qartë. Kërkohet afrimi në formë huazimi që Abazaj të luajë dhe më pas ose të shitet, ose të bëhet përfundimisht pjesë e Tiranës. Palët mësohet se janë duke diskutuar dhe mund të arrihet një akord përfundimtar. Ndërkaq, me afrimin e Abazajt në ekip, hallet për Memën do të shtoheshin, pasi do të ishin shumë lojtarë në repartin e sulmit dhe pak vende për të luajtur. Ditët në vazhdim do të zbulojnë nëse ka diçka konkrete në këtë diskutim.
PROBLEMET - Kristal Abazaj dihet që është pa ekip. Sulmuesi ndryshoi skuadër brenda pak muajsh. Anësori i Anderlehtit u huazua me të drejtë blerjeje në Kroaci tek Osijeku. Në Belgjikë deri në janar 2019, ai nuk gjeti hapësira dhe pati disa oferta. Lokereni dhe St. Truden e tentuan gjatë janarit, por nuk u arrit një marrëveshje. Osijeku e mori në huazim me të drejtë blerjeje, por nuk doli gjë. Lojtari luajti vetëm nëntë takime, shënoi 1 gol dhe u aktivizua 475 minuta. Tani futbollisti është kthyer tek Anderlehti, por skuadra e ka jashtë planeve dhe ai po stërvitet në Tiranë. Kristal Abazaj, një ndër emrat më të lakuar në Shqipëri, i cili konsiderohej si e ardhmja e sulmit të Kombëtares, nuk i përmbushi pritshmëritë tek Anderlehti dhe e ardhmja është në dyshim për të qenë pjesë e skuadrës belge. TIFOZ BARDHEBLU - Kristal Abazaj edhe pse ka folur shumë, muaj më parë ka zbuluar edhe dashurinë e tij për fanellën bardheblu. I pyetur në një emision televiziv se cilën do të zgjidhte mes Tiranës dhe Luftëtarit, ai është shprehur: "Më keni kapur ngushtë, e dua Luftëtarin, por jam tifoz i Tiranës…". Në fakt, Abazaj ka qenë pjesë e akademisë bardheblu, por u largua si i panevojshëm, ndërkohë që lidhja me fanellën mund të bëjë që palët të përshpejtojnë marrëveshjen për Abazajn pjesë të Tiranës.
KALIMI - Abazaj në verë kaloi tek Anderlehti për shumën e 750 mijë eurove, pasi u ble nga Skënderbeu. Korçarët e shitën atë pa luajtur asnjë minutë për ta. Bardhekuqtë e kishin blerë nga Luftëtari, por e lanë në huazim në pjesën e dytë të sezonit 2017-2018.