Luftëtari me administrator të ri, emërohet Artan Lazaj
Revolucion në kupolën e klubit gjirokastrit
Një jurist i njohur merr drejtimin e klubit gjirokastrit. “Panorama Sport” zbulon ndryshimet më të fundit te Luftëtari, teksa zyrtarisht është emëruar si administrator i ri i bluzinjve, Artan Lazaj. Bëhet fjalë për një njohje të vjetër të klubit, i cili ka qenë afër ekipit prej vitesh, por tashmë do të ketë një detyrë shumë të rëndësishme, pikërisht për të administruar Luftëtarin në momentin më të vështirë që pas rikthimit në Kategorinë Superiore. Aksioneri mazhoritar, Bekim Halilaj, i cili “de facto” është president i klubit, ka “bekuar” Lazajn edhe për eksperiencën e madhe që ai ka në fushën ligjore.
VENDIMET - Në mbledhjen e asamblesë së përgjithshme të shoqërisë aksionere KF Luftëtari (75% kompania “ANAST” dhe 25% bashkia Gjirokastër) u morën disa vendime të rëndësishme që prekin kupolën e klubit. Ndryshimet tashmë janë regjistruar edhe në Qendrën Kombëtare të Biznesit, ndërsa nga ky moment mund të thuhet zyrtarisht se Grigor Tavo, Aleksandër Misto, Fatjon Kajushi dhe Gentian Nora janë respektivisht ish-presidenti, ish-aksioneri, ish-administratori dhe ishanëtari i Këshillit të Administrimit. Të gjithë janë zëvendësuar, sepse përveç administratorit Lazaj, janë emëruar si kryetar i Këshillit të Administrimit të klubit, Artur Dadaj (ka qenë më parë aksioner), Qazim Muho (ish-donator) dhe Alban Matushaj (përfaqësues i bashkisë në bordin e klubit). Për të gjithë afati i emërimit është deri më 6 gusht 2022. Vlen të theksohet se nga ish-anëtarët e bordit, së fundmi dha dorëheqjen Gentian Nora, i cili kishte një mandat 3-vjeçar në fuqi. Vendimmarrja në klub tashmë i ka kaluar aksionerit Bekim Halilaj, pasi ka 63%, ndërsa djali i ish-presidentit Tavo (Harrallamb Tavo) ka vetëm 37% në kompaninë që ka blerë klubin tri vite më parë.