Feronikeli test shpresëdhënës, Duarte e Benaser ngrohin motorët
Fitorja në miqësoren ndaj Feronikelit mbase nuk përbën befasi, por Marko Xhampaolo nga testi i Prishtinës ka marrë spunto të tjera pozitive mbi Milanin dhe rritjen e ekipit të tij në aspektin e lojës. Në pjesën e dytë u vu re një skuadër më e vendosur në vullnet dhe më e qartë në manovër. Bonaventura, Paketa, e sidomos Rafael Leao ishin notat më pozitive në Kosovë.
SUKSES DHE RRUGËTIM – Ndaj Feronikelit Milani fitoi miqësoren e parë të sezonit të ri, pasi kishte regjistruar një barazim dhe dy humbje. Ekipi nga Drenasi ishte shumë më i ulët në nivel sesa rivalët e përballur në “International Champions Cup”, por më shumë sesa për golat apo fitoren, Marko Xhampaolo u shqetësua për rrugëtimin e saponisur me kuqezinjtë. “Ishte një takim miqësor në të gjitha kuptimet”, tha Xhampaolo pas ndeshjes në “Fadil Vokrri”. Fjalët e teknikut lidhen me faktin se Feronikeli nuk e vuri për asnjë moment në provë prapavijën italiane dhe se diferencat mes dy skuadrave në fushë janë të dukshme. 90 minutat kosovare do t’i shërbejnë trajnerit 51-vjeçar për të kuptuar më së shumti se sa nga idetë e tij ka përthithur organika, pasi jo më kot Xhampaolo u mundua të hedhë pjesën dërrmuese të ekipit në fushë.
TRIO - Miqësorja e radhës është të shtunën, në 20:30, ndaj Çezenës dhe njëkohësisht do të jetë testi i fundit për Milanin përpara nisjes së kampionatit. Në atë takim do të jetë rasti për të parë në fushë Leo Duarten dhe Ismael Benaserin, por edhe Rafael Leaon. Portugezi la përshtypje shumë të mira në 45 minutat e luajtura ndaj Feronikelit. “Është i padisiplinuar”, komentoi Xhampaolo në lidhje me 20-vjeçarin, një pjesë e potencialit, i të cilit u vu re në lehtësinë për të dribluar dhe sprintuar. Ai duket partner i mirë për Piontekun, të paktën deri në momentin që në Milano do të zbarkojë Angel Korrea. Ky i fundit mund të bëjë fantazistin dhe sulmuesin e dytë, por nuk është kjo koha e verifikimeve, sepse fillimisht duhet zgjidhur problemi i golit për Piontek. Polaku nuk po ingranohet si duhet në skemat e Xhampaolos, por trajneri dhe drejtuesit shpresojnë te metamorfoza e bomberit kur të nisin ndeshjet e vërteta. MODULI – Xhampaolo edhe ndaj Feronikelit e “shtriu” ekipin e tij në telajon e 4-3-1-2-shit. Romanjoli, Suso pas pykave dhe Piontek duken pikat e referimit. Loja e kuqezinjve shënoi rritje me përfshirjen në formacion të cilësisë që korrespondon në emrat e Bonaventurës dhe Paketas. Forma është ajo që ka nevojë për një tjetër rritje, por dy javët e mbetura deri në sfidën e kampionatit kundër Udinezes duken të mjaftueshme. Miqësorja ndaj Çezenës do të ofrojë të tjera tema reflektimi, por te Milani ekziston bindja se moduli është i duhuri, teksa cilësinë dhe sidomos fitoren do të duhet ta sjellë interpretimi i futbollistëve të Xhampaolos.