Kovaç e ka seriozisht: Nuk dua surpriza ndaj Kotbus
Kalimi në turin e dytë të Kupës së Gjermanisë pritet të jetë një formalitet për skuadrën e Bajer- nit të Mynihut. Këtë e ka të qartë edhe skuadra e Kotbusit, e cila do të presë sot bavarezët në shtëpinë e saj. Trajneri i Kotbus, Klaus Diter, nuk ishte shumë optimist në deklaratat e tij para ndeshjes, i cili tha se skuadra e tij do të bënte çdo gjë që diferencat në fushën e lojës të jenë sa më të vogla. "Nuk pres të ndodhë ndonjë çudi, ndaj u kam thënë lojtarëve të kenë kurajë dhe të luajnë përpara, pasi nuk kemi çfarë humbasim ndaj një kundërshtari si Bajerni. Tifozët duan të argëtohen dhe prandaj do të jenë të shumtë në numër. Le t'u dhurojmë atyre një natë të bukur", tha 54-vjeçari. Niko Kovaç, në krahun tjetër, iu përgjigj Diterit, më të cilin ka punuar te Herta e Belrinit në sezonin 1993-1994, duke thënë: "E njoh shumë mirë atë. Mënyra se si motivon skuadrën është fantastike. Por ne jemi Bajerni dhe duhet të tregojmë edhe këtë sezon se duam të shkojmë në finalen e Berlinit. Impenjimi duhet të jetë maksimal nga të gjithë, duke nisur nga unë, stafi im dhe lojtarët në fushën e lojës. Vështirësia në ndeshjet të këtij lloji është e madhe. Nuk ka rëndësi se ku dhe ndaj kujt luan. Kundërshtari është gjithmonë më i motivuar se ty", tha trajneri kroat. Bajerni do të udhëtojë në Kotbus me një skuadër pothuajse të plotë. Mungesa e vetme është mesfushori Havi Martinez. Lukas Hernandez do të jetë në stol dhe me shumë mundësi do të luajë disa minuta në pjesën e dytë, gjithmonë në varësi të rezultatit. Deri këtu nuk shihet asnjë arsye pse Bajerni do të komplikonte kualifikimin që në turin e parë të Kupës. Bavarezët janë kampionët në fuqi dhe nga ata pritet një reagim i shpejtë për të lënë pas humbjen në Superkupë ndaj Dortmundit në fundjavën e kaluar. "Të hënën (sot) nis një rrugëtim i ri për ne. Le të tregojmë forcën tonë të vërtetë", përfundoi trajneri kroat.