Milani i shton “Çelik” mbrojtjes, në skenë edhe Orie
Afrikani dhe turku, Maldini në luftë me... kohën
Milani vazhdon të jetë njëra nga skuadrat më aktive në tregun e transferimeve. 18 herë kampionët e Italisë, që një javë më parë ishin edhe në Prishtinë, janë në përfundim e sipër të organizimit të ekipit, para fillimit të edicionit të ri në Serinë A, që do të nisë fundjavën e ardhshme, më saktësisht më 24 gusht. Kësisoj, njëra prej lëvizjeve të mundshme është edhe largimi i mbrojtësit të djathtë, Andrea Konti. Ishfutbollisti i Atalantës që erdhi me shumë bujë në "San Siro", nuk arriti për asnjë moment ta gjente veten në ekipin kuqezi e si shkak ishin dy dëmtime të njëpasnjëshme në gju që e detyruan t'u nënshtrohej ndërhyrjeve kirurgjikale. Ditët e fundit, Verder Bremen po bën presion ndaj Milanit, duke kërkuar huazimin me të drejtë shitjeje të futbollistit. Oferta si për Kontin ashtu edhe klubin italian duke e kënaqshme, ndaj Maldini ka menduar që fillimisht ta gjejë zëvendësuesin e më pas të kryejë shitjen e mbrojtësit. Drejtori ekzekutiv i "Djallit" ka piketuar mbrojtësin e Totenhemit, Serzh Orie, i cili në veri të Londrës sheh t'i mbyllen hapësirat, sepse Poçetino preferon përpara tij Uoker-Piters dhe Huan Fojt.
TURKU - Përveç korsisë së djathtë, Milani do të tentojë edhe një afrim tjetër për sa i përket prapavijës. Me Kaldaran që duhet ende të riaftësohet (rikthimi në nëntor), kuqezinjtë kërkojnë një mbrojtës. Ardhja e Leo Duartes nuk ndryshon asgjë, ndaj drejtuesi i vëzhguesve të Milanit, Xhefri Monkada, ka servirur një profil interesant. Bëhet fjalë për Mert Çelik, 19-vjeçari që luan për ekipin U-21 të
Instambul Bashaksehirit në Turqi. Kolonë e kombëtares turke në grup-moshat U-19 dhe U-21, Çelik mund të afrohet te Milani brenda kësaj merkatoje. Mbrojtës me perspektivë, 181 cm dhe shumë i shpejtë, vëzhguesit kuqezinj e kanë ndjekur në miqësoren
mes klubit të tij dhe Den Hagut, por gjithashtu edhe në testin mes kombëtareve U19 të Turqisë dhe Sllovenisë. Raportet kanë qenë mbresëlënëse, ndaj Maldini planifikon të investojë 3-5 milionë euro për djaloshin e lindur në Stamboll.