Belica: Duhet të përshtatemi, ta nisim mbarë me Kukësin
Mbrojtësi flet para Kukësit dhe tregon rivalët
Mbrojtësi i Partizanit, Egzon Belica, ka besim se "demat e kuq" do ta nisin mbarë sezonin e ri, edhe pse kampionët e Shqipërisë kanë bërë ndryshime të dukshme nga fundi i edicionit të shkuar. Me një staf e skuadër pothuajse të re, mbrojtësi nga Struga mendon se që në takimin e Superkupës me Kukësin ekipi do të tregojë vlerat që mbart. Në një prononcim të dhënë për "RTSH"-në, Belica shprehet se lojtarët duhet t'u binden urdhrave të stafit të ri që ka tashmë Partizani, ndërsa flet edhe për pretendentët e sezonit të ri.
GRUPI - "Gjendja e skuadrës është e mirë. Pas ndeshjeve në Europë, kthehemi për Superkupën. Fokusi është së pari për ndeshjen e Superkupës ndaj Kukësit, pastaj ta nisim mbarë edhe kampionatin. Ka pasur shumë ndryshime. Ka ardhur një staf që është 70-80% i ri, si dhe ka pasur edhe ndryshime te lojtarët, ku ka pasur largime dhe afrime. Duan dhe ato kohën e tyre".
DY NDESHJE NDAJ KUKËSIT "Kalendari është ai që është. Edhe në fillim, edhe në fund, ne do të përballemi edhe me Kukësin dhe me të gjitha ekipet e tjera. Fillimin e sezonit duhet ta nisim mbarë, me shpresë që të bëjmë edhe një ndeshje të mirë në Superkupë".
MODULI - "Trajneri dhe stafi, ata e vendosin për formacionin. Ne si lojtarë, duhet të bëjmë atë që thuhet dhe vendosin ata". RIVALITETI - "Kukësi dhe Partizani do të jenë sigurisht pretendentë kryesorë për këtë kampionat, duke futur brenda edhe Tiranën, Laçin ndoshta edhe Teutën. Këto do të jenë disa nga ekipet kryesore pretendente për këtë sezon të ri në Kategorinë Superiore".