Ibrahimi: U ktheva ku e nisa, me Prishtinën arrijmë qëllimet
“Labi” prezantohet nga presidenti dhe trajneri
Mbrojtësi nga Lipjani, Labinot Ibrahimi, e ka lënë Partizanin pas gjashtë vitesh për t'u kthyer sërish në Kosovë. 33-vjeçari do të jetë pjesë e skuadrës së Prishtinës, ku ka luajtur edhe më parë për disa edicione. Lojtari ka qenë dje i pranishëm në stadiumin e "2 Korrikut", aty ku Prishtina po i zhvillon përgatitjet e fundit për ndeshjen hapëse të kampionit të ri, ku do të luajnë derbin e kryeqytetit me Flamurtarin. Në shoqërinë e presidentit Remiz Ejupi, Ibrahimi është takuar me trajnerin Mirel Josa dhe bashkëlojtarët e tjerë, të cilët e kanë mirëpritur ardhjen e "Labit". "I urojmë mirëseardhjen Labinotit. Kemi nevojë për eksperiencën, për profesionalizmin që ky djalë ka treguar gjatë gjithë kohës kur ka qenë te klubi nga vjen siç keni treguar ju. Për mua nuk do të thotë asgjë as mosha dhe asgjë. Për mua është ajo që jep në fushë dhe besoj se 'Labi' me eksperiencën e tij shpresoj që ta vazhdojë edhe këtu", u shpreh trajneri Mirel Josa para ekipit gjatë prezantimit të Ibrahimit. Ishmbrojtësi kampion i Partizanit është pritur ngrohtësisht nga bashkëlojtarët dhe ai pritet të jetë një nga shtyllat e mbrojtjes te Prishtina. Pas prezantimit Ibrahimi ka dhënë edhe deklaratën e parë si lojtar i bardhekaltërve të kryeqytetit kosovar: "Pas gjashtë vitesh rikthehem aty ku e nisa. Jam shumë i lumtur dhe besoj se me kontributin tim do t'i arrijmë edhe qëllimet, të cilat i ka FC Prishtina. Ekipin e Prishtinës e njoh, e kam ndjekur secilën ndeshje që kam pasur mundësi. Këtu ka djem të rinj e punëtorë. Së bashku besoj se do t'i arrijmë objektivat. E falënderoj edhe kryetarin Ejupi për këmbënguljen që të vija te Prishtina, po ashtu edhe profesorin Mirel Josa. Inshalla vetëm me këmbë të mbarë dhe t'ia nisim kampionatit siç duhet".