Duro: Të kuqtë një hap para, por dua Superkupën
"Të kuqtë kanë ndryshuar pak, besoj te fitimi i trofeut"
Kukësi prezantoi trajnerin Shpëtim Duro në datën 25 korrik. Afrimi i teknikut kryeqytetas ka një qëllim të qartë, ku tashmë Kukësi me Duron pretendon titullin kampion. Kreu i klubit premtoi 2-3 goditje, afrime të cilat do vinin në ekipin verilindor për të forcuar ekipin dhe për të plotësuar dëshirat profesionale të trajnerit të ri për një skuadër më të mirë dhe më të saktë. Kur afrimet duket se po konkretizohen me kalimin e ditëve, presidenti Gjici i plotësoi dhe një kusht tjetër trajnerit, edhe pse ky i fundit duket se i ka bërë nder klubit duke negociuar e afruar në stafin e ekipit dy emra të njohur në trajnim. I pari është ish-përgatitësi atletik i Partizanit, Andi Kulli. "Qershia mbi
tortë" për plotësimin e stafit ka qenë zv.trajneri i ri. Ai është një emër i njohur në futboll, por më tepër i njohur në Francë dhe Europë, sesa në Shqipëri. Bëhet fjalë për Sero Noka, i cili ka një karrierë të gjatë në trajnim, pasi prej 15 vitesh punon në Francë tek akademia e Le Havres, trajner i ekipeve U-17 dhe U-19. Ka qenë tekniku Duro që si një njohje dhe mik të vjetër i ka bërë ofertë Nokës të bëhet pjesë e stafit të Kukësit si ndihmësi i tij. Projekti, dëshira dhe miqësia që ai ka me trajnerin Duro bënë që Noka ta pranonte
këtë ftesë për bashkëpunim. Noka ka punuar dhe për anglezët e Leister, si rekrutues talentesh. Me këto dy afrime, stafi është i kompletuar.
PRONONCIMI - Ekipi i Kukësit duket tërësisht i rindërtuar nga ai i sezonit të kaluar, veçanërisht në repartin e mbrojtjes. Nën drejtimin e teknikut Shpëtim Duro, skuadra po përpiqet të jetë gati për nisjen e sezonit të ri, si edhe për ndeshjen e Superkupës ndaj Partizanit. Në një intervistë për "Top Channel", trajneri Duro bën një analizë të ekipit, si dhe flet gjithashtu për merkaton dhe finalen e Superkupës.
NDRYSHIMET- "Po tentojmë për të zëvendësuar lojtarët e larguar. Ka vështirësi, sepse akoma nuk kanë ardhur. Kotobelli tani është bashkuar. Një mbrojtës qendre (Erhun Obanor) pritet nesër (sot). Por, nuk kanë
shumë kohë të jenë me skuadrën për ndeshjen e parë".
LARGIMET- "Lojtarë të tillë që kanë dhënë shumë për klubin, nuk kam unë të drejtë t'i largoj nga skuadra. Këtë nuk duhet ta çojë askush nëpër mend. Por, bisedimet me presidentin nuk kanë shkuar aty ku të arrihet edhe marrëveshja".
PRAG PARTIZANI- "Ne po bëjmë maksimumin që të bëjmë një paraqitje të mirë në ndeshjen e parë. Është logjike që Partizani të jetë një hap më para, sepse nuk ka pasur ndryshime, kurse ne kemi pasur edhe këto problemet. Kam besim te kualiteti i skuadrës dhe tentojmë për të fituar Superkupën. Edhe një miqësore duhet ta fitosh, jo më një trofe si Superkupa. Periudha është e shkurtër, do bëjmë maksimumin, por kur kam ardhur, objektivi im ka qenë kampionati dhe Kupa.