Shtohen shkodranët, edhe Rexhepi te Besëlidhja
Portieri i është bashkuar skuadrës së trajnerit Plori
Besëlidhja po vijon stërvitjen me ritëm të lartë dhe me shumë ndeshje miqësore në mes. Të mërkurën lezhjanët luajtën në Durrës ndaj Skënderbeut, ku humbën minimalisht, ndërsa të dielën do të përballen sërish me Vllazninë, por këtë herë në stadiumin “Loro Boriçi”. Me kalimin e kohës duket se Besëlidhja është rritur ndjeshëm. Sidomos në miqësoren e Kavajës me Besën, kjo skuadër tregoi një formë shumë të mirë, duke shënuar plot 6 herë. Drejtuesit e klubit kanë bërë deri tani shumë lëvizje, duke afruar në skuadër lojtarë me shumë përvojë
si Sheta, Gjorgjeviç dhe Hajdari, por edhe të rinj të talentuar. Ndoshta deri në mbylljen e merkatos do të ketë edhe ndonjë afrim të fundit nga presidenti Gjok Noka.
PORTIERI REXHEPI - Një tjetër shkodran
është bashkuar me Besëlidhjen dhe bëhet fjalë për portierin Fabjol Rexhepi. Ai i është bashkuar ekipit të trajnerit Elvis Plori ditën e enjte në stërvitje, por ende nuk është bërë me dije nëse është zyrtarisht pjesë e Besëlidhjes apo jo. Numri i futbollistëve shkodranë për sezonin është shtuar së fundmi me Arsen Hajdarin dhe ndoshta me portierin Rexhepi. Një pjesë e mirë e formacionit të skuadrës lezhjane do të përbëhet nga shkodranët. Nëse qëndron edhe Rexhepi, porta e Besëlidhjes do të jetë totalisht në dorë të shkodranëve, pasi edhe portieri tjetër, Bajri, është nga ky qytet. DIBRA - Shkodrani më jetëgjatë i Besëlidhjes pas viteve ‘90 është mbrojtësi Klejdi Dibra, i cili ka mbyllur 8 sezone me fanellën e saj dhe ka mbajtur edhe shiritin e kapitenit. Për “Panorama Sport”, mbrojtësi thekson: “Besoj se sezoni i ri do të jetë ai i duhuri për Besëlidhjen dhe për këtë më bën optimist performanca e deritanishme e skuadrës, si dhe puna e trajnerit Elvis Plori. Në miqësoret që kemi zhvilluar deri tani, ku dy prej tyre ishin ndaj ekipeve të Superiores, dhamë më të mirën tonë në fushë dhe paraqitja e skuadrës më është dukur mjaft premtuese. Shpresoj se deri në mbyllje të fazës përgatitore skuadra do të jetë në nivelin e duhur nga të gjitha pikëpamjet. Kam shumë besim se do të jemi gati që në start për të marrë atë për të cilën po punohet intensivisht gjatë kësaj periudhe dhe ta ngjisim Besëlidhjen në elitën e futbollit shqiptar”. P. GJIKOLA