Emre Xhan shndërrohet në problem, Sarri mendon ta djegë gjermanin
Trajneri i ri nuk e sheh pjesë të projektit, mund të shitet
Emre Xhan dhe Juventusi mund të vendosin që të shpallin “divorcin” pas vetëm një viti bashkëjetesë. Mesfushori gjerman, i cili mbërriti verën e kaluar nga Liverpuli me parametër zero (u paguan vetëm 16 milionë euro komisione, 10 lojtarit për firmën dhe 6 milionë euro menaxherit të tij), ndoshta mund të vendosë që të kërkojë një skuadër të re për sezonin e ardhshëm. Deri pak muaj më parë, me trajnerin Masimiliano Alegri, ai ishte një ndër pikat më të forta, madje me një rol “alla Bekenbauer”, ai çorientoi totalisht Atletikon e Madridit në përmbysjen e madhe në Torino, por, me sa duket, “magjia” ka
mbaruar me të mbërritur në stol Mauricio Sarri. Trajneri 60-vjeçar, edhe pse është mbështetur shumë te Emre Xhani në miqësoret e verës, ku gjermani ishte lojtari më i aktivizuar prej tij, duket se nuk është bindur plotësisht nga mënyra se si ish-liverpulasi interpreton skemat. Madje, në disa raste, Sarri
është parë edhe shumë nervoz me numrin 23 të Juventusit për ndërhyrjet e shpeshta që ai shkakton ndaj rivalëve, duke parë shpeshherë edhe kartonin e verdhë përpara fytyrës së tij. Dhe ndoshta të gjitha këto janë arsyeja pse kreu i pankinës së “Zonjës së Vjetër” u ka shprehur drejtuesve mundësinë për të nxjerrë në merkato dhe, pse jo, me ofertën e duhur, të paktën prej 40 milionë eurosh, mund të mbushin arkat. Burime pranë kampionëve të Italisë nënvizojnë se Sarri është gati që t’i besojë sërish rolin e titullarit “profesorit” Sami Khedira, sepse duke parë edhe vështirësitë që po has Aron Ramsej
për të gjetur formën optimale, mund të jetë sërish Khedira ai që do ta udhëheqë fazën defensive të repartit të mesfushës. Për momentin, këto janë vetëm zëra, sepse askush nga drejtuesit nuk është prononcuar mbi vërtetësinë e këtij lajmi apo faktin nëse në drejtim të Emre Xhanit mund të ketë oferta,
por sigurisht që vetëm spekulimet e medias mund të bëjnë që situata mes trajnerit dhe futbollistit të nisë të acarohet, prandaj për të shuar apo për t’i dhënë konfirmime këtij “problemi” që mund të ketë lindur, pritet një reagim nga vetë protagonistët ose, akoma më mirë, nga drejtuesit e “Zonjës së Vjetër”.