Juve, Milan, Inter e Napoli, Sançez fut në “sherr” 4 klube
Sulmuesi kërkon largimin, por Solskjaer nuk e lëshon
Aleksis Sançez, ashtu si Pol Pogba apo edhe Romelu Lukaku që e plotësoi dëshirën duke firmosur me Interin, është ndër ata lojtarë që kërkojnë të largohen nga Mançester Junajtid. Edhe pse në radhët e “djajve të kuq” ai është shndërruar në futbollistin më të paguar të Premier Ligës, me 600 mijë euro në javë (përfshirë bonuset), sulmuesi kilian është gati që të heqë dorë nga kjo pagë e majme vetëm për t’u rikthyer aty ku ndihej i lumtur, në Serinë A. Siç raporton “Daily Mail”, menaxheri i tij ka zbarkuar në Itali duke ua ofruar Sançezin katër skuadrave më të mëdha, Juventusit, Milanit, Interit dhe Napolit. Në rastin e bardhezinjve, një akord i mundshëm duket i vështirë, por nëse Paulo Dibala vendos në momentet e fundit që të ndërrojë ambient dhe të pranojë PSG-në, sigurisht që një marrëveshje nuk do të ishte e pamundur. Milani gjithashtu do ta mirëpriste, duke parë vështirësitë që po has në çështjen “Korrea”, por do të pranonte vetëm nëse Junajtid mund ta huazonte me të drejtë blerjeje ose një blerje me këste. Interi gjithashtu është një opsion shumë i mirë, sepse me një si Antonio Konte pikërisht lojtarët e profilit të Sançezit do t’i bënin punë, aq më shumë pas largimit edhe të Ivan Perisiçit. Por edhe Napoli është një kandidat shumë i fortë, pasi Sançez është një “sozi” e Lozanos së PSV-së, me të cilin po bisedojnë, por dëmtimi i meksikanit po vonon firmat. Tani, emri i kilianit është në tavolinat e katër klubeve më të mëdha, por ndërsa drejtuesit e tyre bëjnë vlerësimet e rastit, nga Anglia, trajneri i Mançester Junajtidit, Ole Gunar Solskjaer, kërkon t’i japë një shans: “Nuk më intereson sa para fiton Sançez, sepse nuk ia kam firmosur unë atë kontratë. Unë di të them se ai është një futbollist që e kam në planet e mia, pasi po flasim për një sulmues shumë cilësor. E dua në skuadër, dua ta shoh edhe një herë në ritmet e tij. Ky është mendimi im i qartë dhe i vetëm”, nënvizonte në konferencën e djeshme norvegjezi.