Tare e Rodrigo, “stërkëmbësh” Milanit për dy sulmuesit

Olmo te Lacio, Atletiko mban "peng" Korrean

Sulmuesi Rodrigo i ka kërkuar Valencias ta grumbullojë për ndeshjen e sotme kundër Real Sociedadit. Sikur të mos mjaftonte dëshira e sulmuesit, pronari Piter Lim vijon të grindet me drejtorin sportiv dhe trajnerin Marcelino. Këta të fundit nuk duan që lojtari të shitet për 60 milionë euro, teksa presidenti mendon edhe t'i shkarkojë që të dy vetëm për të realizuar marrëveshjen me Atletikon e Madridit. Duke mbajtur Rodrigon, Valencia nuk do të ketë nevojë për sulmues. Në këto rrethana rrezikon që Andre Silva t'i ngelet "në derë" Milanit që planifikon të arkëtonte 25 milionë euro duke transferuar në "Mestalla". Kësaj amullie i bashkohet edhe Atletiko e Madridit që ka bllokuar bisedimet me Milanin për Angel Korrean. Pa Rodrigon, argjentinasi nuk largohet nga "Los Colchoneros", aq më tepër që italianët nuk realizojnë pritshmëritë madrilene për të arkëtuar 50 milionë euro. Në fakt, sipas "Sportmediaset", Milani ka ofruar 38 milionë euro dhe asnjë qindarkë më shumë për Korrean. Kuqezinjtë e bazojnë ofertën e tyre në paraqitjet e lojtarit. 24vjeçari vijon të kërkojë transferimin në Milanon kuqezi dhe këtë e ka dëshmuar duke refuzuar çdo ofertë nga klube të tjera që ishin të gatshme të derdhnin 50 milionë eurot e kërkuara në arkat e Atletikos.

Tare "parakalon" Milanin - Igli Tare po planifikon një tjetër goditje në merkato. Drejtori shqiptar i Lacios kërkon të transferojë talentin 21-vjeçar të Dinamos së Zagrebit, Dani Olmo. Tare ka marrë informacione për spanjollin, vlera e të cilit përllogaritet në rreth 25 milionë

euro, por problemi më i madh për drejtuesin e bardhekaltërve do të jetë konkurrenca e madhe. Për mesfushorin, në fakt, interesohen Bajern Mynih, Leverkusen, Laipcig dhe Ajaks, me këta të fundit që duket se kanë bërë një ofertë prej 22 milionë eurosh.