Zyrtare, Kutinjo kalon te Bajerni
Sulmuesi pritet të dielën në Bavari, Barça hap vend në skuadër për rikthimin e Nejmarit
Filipe Kutinjo për shëndet Barcelonën pas një viti e gjysmë. Sulmuesi brazilian ka gjetur mbrëmjen e djeshme akordin me Bajernin e Mynihut, skuadër së cilës pritet që t'i bashkohet të dielën në mëngjes, për kryerjen e vizitave mjekësore dhe firmat në kontratë. 27-vjeçari, i cili ishte grumbulluar normalisht për debutimin me Atletiko Bilbaon, në transfertë, u mësua se ishte lënë papritur jashtë skuadre. Arsyeja u kuptua pak minuta përpara startit të sfidës së katalanasve: Kutinjo do të luajë sezonin e ardhshëm me kampionët e Gjermanisë, madje marrëveshja mund të jetë edhe dyvjeçare, por gjithçka do të përcaktohet më qartë në orët në vazhdim. E sigurt është se blerja 130 milionë euroshe e gjigantëve spanjollë, i cili nuk diti të lërë asnjëherë gjurmë përkrah Mesit me shokë, do të veshë fanellën e Bajernit, me rekordmenët e Bundesligës që vazhdojnë të kompletojnë grupin e tyre
pas afrimit sërish në huazim të Ivan Perisiçit nga Interi. Sipas asaj që raporton media spanjolle ("Tiempo de Juego"), por edhe ajo gjermane ("Kicker"), futbollisti ka pasur një ditë të gjatë takimesh të mërkurën. Në fillim ishin paraqitur drejtuesit e PSG-së për ta bindur që të transferohej në Paris, në kuadër të të bërit pjesë në tratativën që do të mund të rikthente Nejmarin në Barcelonë, por papritur, në "Arts Hotel" të Barcelonës është paraqitur shefi i klubit të Bajernit të Mynihut. Karl-Hainc Rumenige kishte planifikuar gjithashtu me menaxherin e Kutinjos dhe nuk kanë vonuar për ta bindur që të pranojë një aventurë të re në Bundesligë, pas eksperiencave në Brazil, Itali, Spanjë dhe Angli. Kutinjo "kërceu" në krye të listës së dëshirave të bavarezëve, pas dëmtimit të pësuar nga Leroi Sane, i cili hodhi në erë akordin mes Bajernit dhe futbollistit. Gjithsesi, nëse për talentin gjerman të Mançester Sitit bisedimet do të vazhdojnë,
pasi ai mbetet një objektiv (por do të mungojë për 6-7 muaj), klubi nga Mynihu do të mirëpresë brazilianin, ndonëse për momentin shifrat nuk janë bërë ende të ditura. Konfirmimin për mbylljen e akordit mes Barcelonës dhe Bajernit të Mynihut, por edhe me vetë lojtarin i konfirmon edhe Guijermo
Amor, një prej drejtuesve të lartë katalanas. "Pranojmë se kemi arritur një akord total me Bajernin e Mynihut për transferimin e Kutinjos. Por më shumë detaje do të japim në orët në vazhdim". Dhe ndoshta, ky largim i brazilianit i hap edhe më shumë rrugën rikthimit të Nejmarit në Katalunjë.