Një muaj larg fushave, Hazard tmerron Realin
Rrezik ridëmtimi, mjekët madrilenë predikojnë kujdes
Ka nisur në mënyrën më të keqe sezoni i Eden Hazardit në kampionatin spanjoll. Belgu duhet të debutonte sot në ora 17:00 ndaj Selta Vigos, por sipas raportit mjekësor të klubit, diçka e tillë do të jetë e pamundur pasi ai ka pësuar një dëmtim në kofshë. Lajmi bëhet edhe më i rëndë duke pasur parasysh faktin se lojtari do t'i mungojë skuadrës për të paktën një muaj. Diagnoza është bërë menjëherë e njohur nga vetë "Los Blancos" që në një komunikatë për mediat, kanë sqaruar: "Nga analizat dhe testet klinike të zhvilluara pas stërvitjes së sotme (djeshme), Eden Hazardit i është diagnostifikuar një dëmtim në pjesën e përparme të kofshës së majtë. Lojtari do të mbahet nën mbikëqyrje teksa do t'u nënshtrohet rishtazi testeve në fillim të javës. Jemi në pritje të përditësimeve". 1 MUAJ JASHTË
Megjithëse te Reali përmendin teste dhe zhvillime të reja, parashikimet fillestare flasin për një muaj pushim të detyruar për Hazardin. Tri ose katër javë pushim janë të domosdoshme në të tilla raste, sepse rreziku i dëmtimit në të njëjtën pikë është shumë i lartë. Pjesa e përparme e kofshës merr ngarkesë maksimale në vrapime dhe sidomos gjatë goditjeve. Megjithëse nuk është këmba e preferuar e 28vjeçarit, nevojitet riaftësim total përpara se mjekët të japin
miratimin e tyre që lojtari të kthehet në dispozicion të Zinedin Zidanit. Për këtë arsye, për belgun do të duhet kujdesi maksimal, sepse ai është edhe kolona ku Reali synon të mbështesë skuadrën që do të tentojë të thyejë hegjemoninë e Barcelonës në kuadër të kampionatit.
Në këto kushte, duke parë edhe mënyrën se si do të ecë faza rehabilituese, Hazard mund t'u bashkohet shokëve të Realit rreth mesit të shtatorit. Kjo do të thotë se ai nuk do të mund t'i përgjigjet kombëtares së Belgjikës për eliminatoret e Europianit të vitit 2020.