Nejmar shërohet si me magji, Tite e grumbullon në kombëtaren e Brazilit
Vinicius, Paketa dhe Samir i Udinezes në grup për miqësoret
Trajneri Tite ka bërë dje publike listën prej 23 lojtarësh që do të grumbullojë në kombëtare për miqësoret e shtatorit ndaj Kolumbisë dhe Perusë. Ajo që ka çuditur këdo që i hedh një sy grupit është emri i Nejmarit. Braziliani vijon të stërvitet i izoluar nga shokët e PSG në pritje të një transferimi në Spanjë. Barcelona dhe Reali i Madridit janë dy destinacionet e mundshme, por në pritje për të gjetur sistemim, 26-vjeçari mund të vijojë përgatitjet me motivimin e ftesës në kombëtare. Raporti i tij me parisienët duket i pashërueshëm, pavarësisht se drejtori Leonardo e qortoi dhe e komplimentoi njëkohësisht pak ditë më parë. 2 shtatori do të jetë data që do të zbardhë të ardhmen e Nejmarit në Paris, teksa poshtë kullës Eifel shpresojnë në një ankand milionash mes Realit dhe Barcelonës.
Polemikat - Nejmar bën bujë me çdo lajm rreth tij. Sikur të mos mjaftonin ato në lidhje me merkaton, edhe në atdhe nuk e kanë pritur mirë grumbullimin e tij. Megjithëse janë thjesht miqësore, për mediat karioka duket i pakuptueshëm vendimi për të grumbulluar një lojtar që nuk luan prej një kohe të gjatë, e që aq më tepër nuk stërvitet me
ekipin e klubit. Emri i Gabigolit është më i përmenduri në këto momente. Sulmuesi i Flamengos ka treguar se e meriton fanellën e Brazilit, e po ashtu Everton i Gremios, por asnjëri nga të dy nuk është marrë në konsideratë pavarësisht se po dhurojnë performanca
mbresëlënëse me ekipet përkatëse në kampionatin brazilian. Gjashtë javë më parë trajneri Tite fitonte "Copa America" pa yllin e "Seleçaos", teksa dje dha një deklaratë që mund të shërbejë si shpjegim për grumbullimin aktual "Nuk do ta lë kurrë jashtë, është një lojtar klasi", deklaronte
Tite, që më ftesën e djeshme konfirmon koherencën e vendimeve të tij. Për përzgjedhësin e Brazilit do të ketë kohë edhe për eksperimente në dy miqësoret e radhës. Ai ka thirrur për herë të parë në ekip Samir të Udinezes, teksa do të ketë mundësi debutimi për Vinicius Jr.