Vllaznia gjen sulmues në Brazil, por shënon... pak
Ka shënuar vetëm 7 herë, por drejtuesit besojnë te 28-vjeçari
Vllaznia gjen më në fund sulmues. Klu bi ka zyrtarizuar dje një tjetër “goditje” në merkato dhe këtë herë për repartin e avancuar. Drejtuesve nuk u ndahet shpirti nga brazilianët. Nëse një sezon më parë i gjetën golat prej Silvio Xhunior (i larguar tashmë), këtë vit kanë marrë Emerson Brito Dos Santos. Pasi ka firmosur kontratë sezonale me opsion rinovimi për një tjetër vit, lojtari është prezantuar me ngjyrat kuqeblu. KONFIRMIMI
Vetë Vllaznia ka njoftuar mbylljen e marrëveshjes me 28vjeçarin, ndërsa në faqen e klubit shkruanin: “Vllaznia bën një tjetër goditje në merkato. Mesditën e sotme (djeshme) është firmosur kontratë me futbollistin brazilian Emerson Brito Dos Santos. Ai luan në pozicionin e sulmuesit të mirëfilltë dhe gjatë karrierës së tij ka luajtur me disa ekipe në Brazil, mes të cilëve edhe me klubin e njohur të Palmeirasit, ndërkohë që sezonin e kaluar ka qenë në Oman. Emerson ka firmosur një kontratë njëvjeçare me klubin tonë, me të drejtë rinovimi edhe për një
sezon tjetër. Me ardhjen e këtij lojtari, skuadra merr edhe më shumë formë edhe në repartin e sulmit, por drejtuesit e klubit janë duke punuar edhe për përforcime të tjera”. ALTERNATIVAT Mirad Jonuz do të ketë një alternativë më shumë në ofensivë, ndërsa kujtojmë se gjatë fazës përgatitore iu desh që të bënte llogaritë me tre “vogëlushë” apo të adaptonte si “pykë” Shtubinën. Duhet thënë se CV-ja e Emerson është realisht e pasur, por referuar të dhënave që ofrojnë faqet e specializuara për futbollistët në mbarë botën, rezulton se është disi i kursyer me golat. Ka luajtur edhe me Palmeirasin në Brazil apo me Al Seeb në Oman, por prej 2010-ës e ka gjetur vetëm 7 herë rrjetën.
AFRIMET
Me brazilianin, numri i të
afruarve shkon në nëntë. Klubi e ka hapur merkaton me Herald Markun dhe Dajan Shehin, për të vijuar me dyshen maqedonase Filip Gligorov e Aleksandar Ristevski. Pjesë e organikës u bë edhe shkodrani Behar Ramadani me moldavin Maksim Kojakaru. Firma e fundit ishte ajo e Ndriçim Shtubinës që iu bashkua ekipit pak para nisjes së skuadrës për në fazën përgatitore në Ohër. Ndërsa Emerson
Brito Do Santos është i fundit në radhë, por jo në merkato. PRITSHMËRITË
Klubi duket se nuk ka në plan që ta mbyllë këtu, pasi po operon për të afruar edhe disa elementë të tjerë për të ndërtuar një skuadër konkurruese. Dhe kërkimet janë ndalur sërish për sulmin, por edhe për një mesfushor qendre. Me gjetjen e tyre, mund të quhet tërësisht e mbyllur edhe merkatoja.