Dëmtimi i njëjtë me Mesin, Suarez trondit Barcelonën
Problemet në sulm, katalanasit rishqyrtojnë dosjen "Nejmar"
Debutimi i shëmtu ar në kampionat me humbjen në Bilbao ndaj Atletikos është vetëm një aspekt i problemeve të Barcelonës. Në fakt, dje katalanasit janë njohur specifikisht me dëmtimin e Luis Suarezit. Uruguaiani doli nga fusha në minutën e 37-të të ndeshjes së të premtes në "San Mames". Sulmuesi ankohej për dhimbje të forta në pulpë, çka e detyroi Ernesto Valverden ta zëvendësonte me Rafinjën. Ditën e djeshme Suarez u është nënshtruar vizitave mjekësore, të cilat kanë evidentuar një tërheqje në pulpën e djathtë. Kohët e riaftësimit do të vlerësohen në ditët në vijim, por sipas mediave spanjolle, 3 vjeçarit do t'i duhen 3-4 javë kohë për t'u shëruar. Përveç ndeshjeve në kampionat, ai do të humbë edhe miqësoret e shtatorit me Uruguain, ndaj me shumë gjasa do të jetë gati për blaugranët pas pushimit të kombëtareve.
TRI PROBLEMET
- Ai i Suarez është vetëm dëmtimi i radhës te Barça. Tërheqja në pulpë është identike me atë të Leo Mesit. Argjentinasi prej një jave stërvitet vetëm dhe megjithëse është pranë shërimit, askush në klubin katalanas nuk jep datën e kthimit të tij në fushë. Në fundjavë "Pleshti" stërvitej në rërë, por dëmtimi i tij nuk mund të cilësohet si zyrtarisht i lënë pas. Asnjë problem shëndetësor për Antuan Grizmanin, por edhe ai e shqetëson Barcelonën. Pas ndeshjes me Bilbaon, Ernesto Valverde u shpreh i shqetësuar me ambientimin e francezit. Sipas trajnerit, lojtari i ardhur nga Atletiko e Madridit për 126 milionë euro, vuan taktikisht skemat e Barcelonës. Ai vijon të luajë më shumë në të majtë, teksa i kërkohet të jetë më në qendër të fushës dhe manovrës. Përveç Grizmanit, pesha e sulmit duhet të mbahet edhe nga një tjetër kampion bote si Osman Dembele. Ai nuk shënoi të premten dhe në golin e Bilbaos debatoi me
Zherard Pikenë. Mbrojtësi fajësoi francezin që nuk e mbuloi si duhet Ander Kapan, i cili më pas krosoi duke i servirur asistin e golit Adurizit.
LUTJE PËR MERKATO Ankesat e Ernesto Valverdes pas ndeshjes me Bilbaon janë një kambanë alarmi për drejtuesit. Siç thamë, Mesi nuk dihet kur do të jetë gati, e akoma më dyshime ngjall rasti "Suarez". Mes problemeve taktike të Grizmanit dhe Dembelesë, lind mendimi se Barça ka nevojë për një sulmues tjetër që mund të bëjë diferencën. Emri që vjen natyrshëm në mendje është ai i Nejmar që jo vetëm ka cilësi, por njeh edhe ambientin. Kjo nevojë për prurje në sulm mund t'i shtyjë drejtuesit të hidhen në merkato për të bërë një sforco për të siguruar brazilianin. Koha nuk është në favor të katalanasve, por nevoja mund të shndërrohet në virtyt dhe Valverde të ketë një tjetër gjahtar goli në ekip.