Shpejtësi dhe gola, ja çfarë i mungon Milanit
Pas firmës së parë nuk ekzistonin "smartphone"-t dhe rrjetet sociale, Sarri ishte ende me flokë, Paratiçi luanin akoma futboll
Pas një sezoni mes shumë dritëhijesh në Paris, Xhanluixhi Bufon bëri rik thimin te Juventusi për të luajtur vitin e fundit të karrierës së tij. 41-vjeçari, firmën e parë e hodhi më 4 korrik 2001, por kjo e dyta ishte ndoshta dhurata më e bukur që mund t'i bënte karrierës. Gjithsesi, nga e para e deri më 4 korrik 2019, kanë qenë 18 vite në të cilat ka ndryshuar jo vetëm portieri legjendar italian, pa dyshim një ndër më të mirët e historisë, por edhe një pjesë shumë e mirë e botës në të cilën jetojmë. Madje, akoma më tepër kanë ndryshuar edhe shumë personazhe që kanë shënuar jetën dhe karrierën e vetë "Supermen"-it.
FIRMA E PARË
Në vitin 2001, Bufon u ble nga Juventusi për 75 miliardë lireta, plus transferimin në Parma të Xhonatan Bakinit, të vlerësuar 30 miliardë lireta. Portieri iu bashkua në grumbullim skuadrës që atëherë drejtohej nga Marçelo Lipi më 3 gusht dhe në datën 4 u bë edhe prezantimi i tij, pasi ishin hedhur edhe firmat në kontratë. Xhixhi u prezantua së bashku me Pavel Nedvedin (u ble nga Lacio për 75 miliardë lireta), Lilian Turamin (mbërriti te Parma për 70 miliardë lireta, por edhe përkrah Kristian Zenonit. Vera e vitit 2001 ishte një ndër më historiket për sa i përket historisë së futbollit, duke qenë se të gjitha këto blerje të mëdha të Juves përkuan edhe me largimin nga Torino të Zinedin Zidanit, i cili kaloi te Reali për 150 miliardë lireta.
ANDREA ANJELI
18 vite më parë, edhe presidenti aktual i Juves bënte një jetë tjetër. Mes viteve 20012004, Anjeli punonte në kompaninë "Philip Morris International" në Lozanë, ku fillimisht merrej me marketing dhe sponsorizime, ndërsa më pas u bë shefi i komunikacionit me median. Gjithsesi, Juventusi dallohej se kishte nisur të ishte në mendimet e tij, ndonëse pamja ishte krejt ndryshe, me Anjelin që i ngjasonte më shumë një "buzëqumështi"...
FABIO PARATIÇI
Në 2001-shin, drejtori sportiv i Juventusit bënte ende futbollistin, më saktësisht "xholin" mes mbrojtjes dhe mesfushës. Në verën e 18 viteve më parë, edhe Paratiçi transferohej nga Savoia te Xhuliano, skuadra e tij e parafundit, përpara se ta mbyllte me Brindizin.
XHORXHO KIELINI
Sivjet te Juventusi, Bufoni rigjen mbrojtësin, i cili trashëgoi edhe shiritin e kapitenit pas largimit të portierit verën e kaluar në Paris. Kielini është një ndër të mbijetuarit e "BBC"-së së famshme, së bashku me Leonardo Bonuçin, pas tërheqjes së Andrea Barzaljit. Në vitin 2001, Kielini nuk ishte i vogël: kishte 16 vite mbi shpatulla dhe luante për Livornon në Serinë C1.
LEONARDO BONUÇI
Kur Bufon mbërriti te Juvja për herë të parë, edhe historia sportive e mbrojtësit të datëlindjes 1987 ishte shumë ndryshe. Në verën e vitit 2001, Bonuçi ishte pjesë e të rinjve të Viterbezes, skuadra e vendlindjes së tij.
MASIMILIANO ALEGRI
Sivjet Bufon nuk rigjen Masimiliano Alegrin në stol, trajnerin me të cilin fitoi 4 tituj kampionë. Ndërsa në vitin 2001, "Konti Maks" ishte një futbollist në aktivitet, konkretisht në radhët e Alianezes, skuadër me të cilën nisi edhe aventurën në pankinë në vitin 2003, pasi e kishte mbyllur me futbollin e luajtur.
MAURICIO SARRI
Ndërkohë, Bufon do të gjejë në pankinën e Juves Mauricio Sarrin, i cili pak vite më parë drejtonte "armiqtë" e Napolit. Në vitin 2001, Sarri, atëherë edhe me shumë flokë mbi kokë, fitonte kampionatin e Kategorisë së Gjashtë me Sansovinon, skuadër të cilën për tri vite arriti ta ngjiste në C2, por në të njëjtën kohë edhe në fitoren e Kupës së Italisë për Serinë D në sezonin 2002-2003.
MATAJS DE LIGT
"Supermeni" Bufon do të gjejë në skuadër edhe mbrojtësin më të lakmuar të merkatos së verës, 19-vjeçarin që zbarkoi nga Ajaksi për 85.5 milionë euro, "likuiduesin" e Juventusit nga Champions-i sezonin e kaluar në Champions, me golin deciziv në Torino. Nëse sivjet do të jenë shokë skuadre, kur Bufon firmoste herën e parë me Juven, De Ligt sapo kishte festuar ditëlindjen e tij të dytë. KRISTIANO RONALDO
Kur u dukën se rrugët e tyre u ndanë përgjithmonë, duke qenë se verën e kaluar Xhixhi firmosi në Paris, ndërsa Ronaldo në Torino, kur Bufon u bë juventin herën e parë, CR7 luante në radhët e të rinjve të Sportingut të Lisbonës. Gjithsesi, ai kishte nisur të përgatiste terrenin, i cili do ta dërgonte në verën e vitit 2003 te Mançester Junajtid, përpara se të shndërrohej në një legjendë te Reali i Madridit.
MANÇESTER SITI
Verën e kaluar e refuzoi për të zgjedhur PSG-në, por 18 vite më parë, ajo që sot është shndërruar në një nga klubet gjigante të Europës, në 2001-shin Mançester Siti binte nga kategoria në Angli, pasi e mbylli Premier Ligën në vend të 18-të. Gjithsesi, sezonin që pasoi ata dolën kampionë në "Championship" (Kategoria e Dytë angleze), për t'u rikthyer dhe për të mos zbritur kurrë nga 20 më të mirat e Anglisë.
FORMULA 1
18 vite më parë ndryshoi historia edhe në disa sporte të tjera. Në vitin 2001 niste epoka fituese e Mikael Shumakerit me Ferrarin në Formula 1. Pas dopietës së titujve në timonin e Benetonit (1994, 1995), piloti gjerman fitoi Botërorin e parë me "kokëkuqen" dhe u konfirmua kampion për pesë vite me radhë me makinën e familjes Anjeli.
Klasi 500 ç / Moto GP
Kur Bufon firmosi herën e parë te Juventusi, "dy gomat" nuk ishin ende perandoria e Valentino Rosit. Në muajt e fundit të vitit 2001, "Doktori" fitonte titullin e parë në klasin 500 ç dhe nga ai sukses nuk rreshti më së festuari, duke u konfirmuar sërish kampion në vitet 2002, 2003, 2004, 2005, 2008 dhe 2009.
KINEMAJA
Në vitin 2001 nuk u shkrua vetëm historia e futbollit italian me transferimin e parë të Bufonit te Juvja, por ishte edhe një vit ndryshimi global edhe në kinematografi. 18 vite më parë u dha premiera e "Harri Potter, guri filozofik", episodi i parë i sagës së frymëzuar nga romanet e shkruara nga Xh.K Rouling. Për më shumë, viti 2001, çmimi "Oskar" si filmi më i mirë i shkoi "Gladiatorit", i cili ka hyrë me të drejtë në historinë e kinematografisë.
TEKNOLOGJIA
Por gjatë 18 viteve mes dy firmave, ajo që ka ecur me hapa galopantë ka qenë teknologjia, sidomos bota e telefonave. Në vitin 2001 "smartphone"-t jo vetëm nuk ekzistonin, por nuk dihej nëse ky produkt do të vinte ndonjëherë në jetë. Në atë periudhë, padronët e telefonisë celulare ishin "Nokia", "Motorola", "Ericsson", të cilat sot kanë përfunduar në papafingo. Nuk ekzistonin as rrjetet sociale, "Facebook" apo "Instagram", dy ndër "drogat" e kohëve të sotme...
Shkurt dhe qartë, Xhanluixhi Bufoni duket se ka lindur i predispozuar që të ndryshojë jo vetëm fatet e një ndeshjeje mes portave, por edhe historinë e globit, në këto 18 vite në planetin "Juventus".