Skënderbeu bën “pazar” në Ganë, gati 2 lojtarë
Trajneri Daja do të thotë fjalën e fundit për qendërmbrojtësin dhe mesfushorin e qendrës
Skënderbeu nuk e ka mbyllur ende merka ton, teksa goditjet në limite pritet të jenë të shumta për klubin bardhekuq. I përfshirë në bisedime për huazimin e Dorian Kërçikut dhe Asion Dajës nga ekipi i Tiranës, korçarët kanë prenotuar dy futbollistë me perspektivë për të ardhmen. Dy lojtarët afrikanë janë pjesë e kombëtares U-21 të Ganës dhe për momentin janë në aktivitet me ekipin e tyre përfaqësues. Bëhet fjalë për Mohamed Adams dhe Emanuel Kofi Esien, të cilët priten që gjatë javës të bashkohen me Skënderbeun në stërvitje për t'u vënë më pas nën urdhrat e trajnerit Ilir Daja. Të dy futbollistët kanë arritur akordin me Skënderbeun për të firmosur një kontratë 2vjeçare me të drejtën për rinovimin edhe për një sezon tjetër. Gjithsesi, i rëndësishëm mbetet fakti se si Adams, ashtu edhe Esien janë në aktivitet dhe forma e tyre pritet të jetë e mirë dhe gati për lojë. Teksa nga ana tjetër futbollistët në fjalë mbulojnë pozicione ku trajneri i Skënderbeut kishte domosdoshmëri për afrime të reja. Skënderbeu i ri pritet të mos jetë si ai i epokës "së artë", gjithsesi drejtuesit po punojnë për ndërtimin e një ekipi konkurrues në Kategorinë Superiore.
MOHAMED ADAMS
Mohamed Adams është 19 vjeç dhe luan si mbrojtës qendre. Një afrim i mirë ky për Skënderbeun që do të mbushë hapësirat e lira të lëna bosh nga largimet e shumë lojtarëve pas sezonit të kaluar. Adams, falë shtatlartësisë është një futbollist që sipas të dhënave, ka forcë në ajër dhe saktësi në mbulimin e zonave. KOFI ESIEN
Një emër i njohur në botën e futbollit, ashtu si ish-mesfushori i Çelsit, edhe Kofi Esien luan si mesfushor qendre
dhe shquhet për forcën fizike dhe rendimentin që ka në lojë. Një lojtar i fortë dhe i shpejtë që Ilir Daja mund ta përdorë si "ekran" në fushë, por edhe si mesfushor i mirëfilltë. Të dyja këto afrime pritet që të paraqiten në Korçë përpara Ilir Dajës për të
bërë edhe zyrtarizimin si lojtarë të Skënderbeut. Më pas do të jetë trajneri ai që do të vendosë nëse të dy këta futbollistë janë gati për të përballuar cilësisht kampionatin tonë apo do të duhet të kalojnë fillimisht në provën e ekipit. Me laps dhe
letër në dorë, tashmë Ilir Daja ka një ekip më të kompletuar dhe nëse do të kompletohet edhe huazimi i Kërçikut dhe Dajës, atëherë trajneri i Skënderbeut mund të marrë frymë lirisht për sa i përket përbërjes së ekipit që ka në dispozicion.