Idrizi: Nëse Memushi gjen 1 miliard lekë, iki direkt
"E ftoj të dalë sot në stërvitje si trajner i dytë"
Sinan Idrizi reagon pas deklaratave të ish-trajnerit të Flamurtarit, Eqerem Memushi. Në një prononcim të dhënë për "Panorama Sport", administratori i klubit vlonjat thotë se nëse Memushi i ka një miliard lekë, është i gatshëm të hapë krahun dhe të largohet nga Flamurtari. "Ka dalë një biznesmen që quhet Eqerem Memushi, që ka 1 miliard lekë. Unë Eqeremin...
Sinan Idrizi reagon pas deklaratave të ish-trajnerit të Flamurtarit, Eqerem Memushi. Në një prononcim të dhënë për "Panorama Sport", administratori i klubit vlonjat thotë se nëse Memushi i ka një miliard lekë, është i gatshëm të hapë krahun dhe të largohet nga Flamurtari. "Ka dalë një biznesmen që quhet Eqerem Memushi, që ka 1 miliard dollarë. Unë Eqeremin e kam shumë mik, e respektoj shumë. Unë e di që është i pasur dhe nëse është i gatshëm që do ta marrë Flamurtarin dhe nëse ai e mendon seriozisht këtë gjë, që ka njerëz të tillë, unë menjëherë largohem. Memushi është njeri me vlera të larta, me karakter të lartë, me integritet të lartë. Është njeri i nderuar dhe i respektuar në Vlorë. Ai kështu mendon dhe unë nuk them asgjë të keqe. Po, jam dakord që menjëherë të largohem. E pranoj menjëherë! Sepse, Eqeremi e ndien më shumë Flamurtarin nga unë, e do më shumë nga unë dhe kaq. Unë nuk e di që është miliarder. Unë e di që ka punuar në Pyjore. Nëse atje ka bërë kaq para sa të vijë te Flamurtari, patjetër le të vijë. Është njeri me vlera, nuk kam çfarë të them më. Nëse ai mendon se unë jam pengesë për Flamurtarin dhe gjen njerëz të pasur që kanë para, jo tri ditë jo, por për tri orë largohem unë, menjëherë. Unë e vlerësoj shumë pozitivisht mendimin e Eqeremit. Deri dje po mendoja që ta merrja në ekip Memushin, të na ndihmonte dhe të bënim një grup vlonjatësh, le të jetë edhe kundër meje, nuk ka problem", thotë fillimisht Idrizi.
KRENARIA
Idrizi nuk e paragjykon idenë e Memushit, por ka diçka që, sipas tij, e bën të ndihet krenar. "Flamurtari është pronë e qytetit të Vlorës, nuk diskutohet kjo. Mendon se e bën më mirë dhe ka një grup, po patjetër le të vijë. Këto histori me 1-miliardëshe që ka gjetur Qeremi, mua më bëhet qejfi. Unë e përsëris që s'kam qenë, jam dhe s'do të jem te Flamurtari. Flamurtari ka qenë, është dhe do të jetë. Në Vlorë ka me qindra dhe mijëra që e bëjnë më mirë nga unë këtë punë. Nëse ai me syrin e tij thotë që Sinani është problem për Flamurtarin, nuk ka asgjë të keqe. I ka bërë paratë, të vijë. Nëse i ka realisht këto para dhe nëse i ka realisht këta vullnetarë të Enverit që punojnë, le të vijë, unë hap krahun. Ai mendon se Sinani është i paaftë, OK, nuk ka gjë të keqe këtu. E ka menduar gjatë, nuk ka problem. Nuk është vetëm ky, ka edhe shumë të tjerë që e mendojnë këtë, që ky nuk e bën këtë punë. Menjëherë e dorëzoj unë. Jam krenar për një gjë, që po bëhem promotor i ligjit për sportin. Që sot (dje) që po flasim bashkë ne, jam duke u marrë me këtë histori dhe deri në datën 3 shtator del ligji i privatizimit", është shprehur administratori i Flamurtarit.
BATUTA
Ish-trajneri Eqerem Memushi u shpreh gjatë intervistës se Idrizi është president me paratë e të tjerëve. Ja përgjigjja e kreut aktual të klubit vlonjat: "Unë president me paratë e të tjerëve? Te kjo puna e parave nuk dua që të bëj asnjë koment. Sepse, kjo puna e parave është si puna e priftit. Të rrij unë tani e të flas, po e ulim shumë piacën, dua të heq dorë nga modestia. Ulet shumë piaca të komentoj punë parash me një zotëri të nderuar si puna e shokut Eqerem Memushi. Unë nuk jam as politikan, as sportist. Unë jam marrë me biznes. Mirë apo keq, me punët e mia. Shoku Eqerem është edhe politikan, është
edhe sportist, është edhe biznesmen dhe i ka të gjitha këto. Unë nuk kam kapacitetet e tij që t'i kthej përgjigje. Thjesht e nderoj, e respektoj. Realisht më bën nder që është ish-lojtar i Flamurtarit të nderuar të Vlorës. Për të tjerat pastaj, këto historitë me para..." Por Idrizi e përcjell po me batutë atë çfarë Memushi tha ditën kur ai u prezantua si drejtues i Flamurtarit. "Aty ka të drejtë, është fiks fare. Në ditën që unë bëra prezantimin ishin Trokallari, Fjodori dhe Xhejmsi, por mungonte Qemushi. Qemushin e pres që të jetë ditën tjetër me mua, e pres të vijë kur të dojë", theksoi Idrizi.
FTESA
Nëpërmjet "Panorama Sport", administratori Idrizi fton Memushin që t'i bashkohet Flamurtarit ditën e sotme në stërvitje si zëvendëstrajner. "Pres me qejfin më të madh dhe me dëshirën më të madhe Eqerem Memushin të dalë realisht me Flamurtarin nesër (sot) në stërvitje si trajner i dytë i ekipit. Pranë Sadedinit do të jetë një dyshe shumë e mirë dhe do të jetë një shembull i mirë i bashkëpunimit të të kundërtve. Qeremi nuk është e kundërta ime, është si të gjithë të tjerët", përfundon ai.