Luftëtari gjen fantazist, vjen shqiptari që luante në Bullgari
Apostol Furxhiu forcon bluzinjtë në mesfushë, priten të tjera afrime
Një fantazist shqiptar për Luftëtarin. Nga dje, 23-vjeçari i lindur në Selanik, Apostol Furxhiu, është zyrtarisht lojtar i bluzinjve, teksa ka firmosur një kontratë 1-vjeçare me të drejtë rinovimi edhe për një sezon tjetër. Mesfushori është një numër 10 tipik, nga i cili drejtuesit e Luftëtarit presin të bëjnë diferencën në kampionatin shqiptar. Karriera e të riut ka qenë me ulje-ngritje, pasi kryesisht ka luajtur në ligat e ulëta në Greqi, ndërsa hapin e parë të madh e bëri me transferimin te klubi i Superligës bullgare, Botev Vratsa. Mirëpo, këtu gjërat nuk shkuan sipas parashikimeve dhe pas startit të kampionatit bullgar, lojtari doli jashtë planeve të trajnerit.
Duke mos pasur hapësirat e duhura, Furxhiu prishi kontratën me Botev dhe ditët e fundit u fut në bisedime me Luftëtarin. Lajmin për transferimin e tij te gjirokastritët e konfirmoi dje vetë presidenti i gjirokastritëve, Bekim Halilaj. "Apostol Furxhiu është emri më i fundit që kemi arritur marrëveshjen dhe vjen
sot (dje) për të nisur menjëherë stërvitjen. Në ditët e ardhshme do të kemi të tjera përforcime të rëndësishme, në mënyrë që ekipi të kompletohet me lojtarë cilësorë", deklaroi Halilaj. Furxhiu është rritur në akademinë eArisit në Selanik, madje ka qenë edhe për një kohë të shkurtër pjesë e grup-moshave të PAOK-ut. Fantazisti është grumbulluar në ekipin e parë të Arisit në sezonin 2014-2015, e më pas është huazuar në disa ekipe brenda Greqisë. Furxhiu ka pasur një eksperiencë të shkurtër edhe në Ligën e Katërt gjermane me skuadrën SV Morlautern.
MERKATO - Luftëtari është në pritje të mbrojtësit grek, Mavrudis Bugaidis, i cili ka rënë dakord me drejtuesit dhe deri të premten do të jetë në Gjirokastër. Shpresohej që ai të ishte gati për sfidën e parë me Tiranën, por tashmë çdo gjë do të shihet në ditët e ardhshme. Klubi është në bisedime edhe me brazilianin Kumbinjo, i cili në të kaluarën është aktivizuar për shumë ekipe në Greqi, mes tyre Olimpiakos, ndërsa ka bërë emër edhe në Azerbajxhan si pjesë e Karabakut. Deri më tani pjesë e gjirokastritëve janë bërë lojtarë si portieri grek, Panajotis Paiteris, të rinjtë që kanë qenë pjesë e Partizanit si Franc Lala, Joan Çela dhe Gresild Lika, mesfushori Klinti Qato nga Teuta, mbrojtësi i majtë brazilian, Xhonatan De Soza, qendërmbrojtësi shkodran, Enes Isufi, sulmuesi i krahut, Andi Renja, që vjen nga Superliga bullgare, si dhe të tjerë emra të cilët janë akoma në provë dhe nuk kanë marrë ende miratimin e klubit. T.Shehu