“Ultimatum” për startin, nëntë pikë në tri ndeshje
Luajnë në 8 ditë me Luftëtarin, Teutën e Vllazninë
Drejtuesit e Tiranës kërkojnë nëntë pikë në tri ndeshje. Në mbledhjet e fundit mes drejtuesve dhe skuadrës nga ana e trajnerit dhe presidentit është kërkuar përqendrim i skuadrës. Këshilla është e qartë. Ndeshjet duhet të merren një për një dhe të fitohen. Ama, veç këshillave, ka edhe një formë kërkese nga ana e drejtuesve, më së shumti e presidentit dhe trajnerit Mema. Java e fundit e gushtit është vendimtare për nisjen e sezonit. Si Halili dhe Mema kërkojnë shumë. Ndaj Luftëtarit, Teutës dhe Vllaznisë duan nëntë pikë të plota, që do të ishte maksimumi për bardheblutë, të cilët kanë vite që nuk e nisin sezonin me tri fitore radhazi, që do të thoshte shumë, pasi ekipi bardheblu do të ishte i qetë gjatë pushimit të kampionatit.
Po kështu, Tirana ka për detyrë që ta fitojë dhe derbin, pasi 23 pikë diferencë ishte bilanci i sezonit të shkuar mes Partizanit që u shpall kampion me 70 pikë të grumbulluara dhe Tiranës me 47, që u rendit në vendin e 7-të. Këtë vit bardheblutë do të synojnë vendet e para, por së fundmi është artikuluar edhe titulli kampion.
Mbledhjet - Pak javë më parë, si presidenti Refik Halili dhe trajneri Ardia Mema kërkuan një nisje perfekte të sezonit. Sipas tij, skuadra i ka mundësitë që të bëjë gjëra të mëdha, duke filluar nga
java e parë deri në fund të kampionatit. Rritja duhet të jetë pak nga pak për të treguar që Tirana është një skuadër e madhe dhe që këtë vit kërkon titullin për të festuar 100-vjetorin e klubit bardheblu. Presidenti ka ndaluar edhe te sherret dhe problemet që kanë qenë temë e ditës te Tirana. Halili ka kërkuar nga të gjithë një sjellje shembullore, duke kërkuar që sherret dhe sjellja e keqe, sidomos ndaj trajnerit, është e ndaluar. Numri një i klubit i ka paralajmëruar të gjithë se nuk do të tolerojë më probleme si ato që ndodhën në fazën përgatitore të Ohrit. Është folur edhe për probleme të tjera, por në mënyrë gjenerale, ndërsa Halili i ka këshilluar të gjithë që ky sezon të mos shkojë kot.
Dhjetë vite ka Tirana pa e fituar titullin kampion. Skuadra këtë vit ka edhe 100vjetorin e formimit të klubit dhe të gjithë shpresojnë te titulli i 25-të. Gjashtë takime miqësore ka zhvilluar deri tani ekipi i Tiranës. Skuadra ka fituar tri takime në Tiranë, ka barazuar një dhe ka humbur dy miqësore në Ohër.