Dy sulmues në provë, mbërrin edhe një mbrojtës i majtë portugez
Shumë lojtarë presin OK-in e trajnerit Dalipi, zbulohen emrat
Mbi 40 futbollistë janë provuar në këtë periudhë te Luftëtari. Trajneri Klevis Dalipi ka bërë seleksionime të vazhdueshme, derisa aktualisht kanë mbetur 25 lojtarë, por që sërish ka dilema. Të shumtë kanë qenë ata që vijnë nga Greqia. Bëhet fjalë për lojtarë shqiptarë që aktivizohen në klube të Superligës dhe ligave të tjera më të ulëta në shtetin helen. Në këto tri sezonet e fundit shpesh gjirokastritët kanë hedhur sytë nga ajo që ofron tregu në vendin fqinj dhe nuk kanë dalë pa gjë, sepse thuajse të gjithë lojtarët e ardhur nga ekipet helene kanë shkëlqyer me fanellën bluzi. I fundit ishte qendërmbrojtësi Dimitris Koconis, që pasi bëri mirë me bluzinjtë në pjesën e dytë të sezonit të kaluar, u rikthye te një ekip me emër në Greqi, Panahaiqi. Ndërkohë, dje i janë bashkuar Luftëtarit edhe dy lojtarë të tjerë, krahas atyre që po stërviten rregullisht. Bëhet fjalë për sulmuesin kurbinas, Spartak Ajazi, dhe mbrojtësin e majtë portugez, Zhoao Mendez. I pari ka luajtur me skuadra si Laçi, Besëlidhja, Burreli dhe Iliria. Ndërsa Mendez vjen nga kampionati grek, ku së fundmi ka qenë pjesë e Aspropirgosit në Ligën e Tretë. Mbrojtësi i majtë ka qenë në vitin e kaluar edhe te Kamza në provë, por nuk qëndroi, ndërsa tashmë pret të provojë shansin te Luftëtari. Gjithashtu, duke u testuar te bluzinjtë është edhe qendërsulmuesi lezhjan, Jurgen Dushkaj. Ky i fundit vjen pas një eksperience në disa skuadra rumune të Ligës së Dytë. Prej ditësh po stërvitet edhe qendërmbrojtësi Regild Zeneli, i ardhur nga Turbina. Ndërkohë, pjesë e bluzinjve janë edhe elementët e rinj gjirokastritë si Stiven Puci dhe Ardit Ziaji, të cilët pritet të konfirmohen. Në sezonin 20172018 të dy kanë marrë minuta në Superiore si pjesë e gjirokastritëve. T.Shehu