Laçi pa frikë në Shkodër, synohet fitorja
Përgatitjet para Vllaznisë, flasin protagonistët e mbrojtjes Gjoni dhe Fangaj
Laçi i trajnerit Sulejman Starova po kalon një moment të mirë në prag të sezonit të ri futbollistik. Skuadra kurbinase ka pasur ndryshime të dukshme gjatë fazës përgatitore verore, ku hyrje-daljet në merkato kanë qenë të shumta. Laçianët e nisin kampionatin e 81-të të Kategorisë Superiore në transfertë. Laçi po vijon përgatitjet në aneksin e stadiumit të qytetit të tyre për ndeshjen e parë në kampionat përballë Vllaznisë në "Loro Boriçi". Në një prononcim për "RTSH", dy nga "shtyllat" e mbrojtjes së skuadrës kurbinase, Eglentin Gjoni dhe Abdurrahman Fangaj, tregojnë për këto përgatitje, si dhe për objektivin për premierën sezonale ndaj Vllaznisë, e cila sapo është ngjitur nga Kategoria e Parë në Superiore. KAPITENI GJONI
Pas largimit të portierit Gentjan Selmani, pritet që shiriti i kapitenit te Laçi t'i kalojë mbrojtësit Eglentin Gjoni, i cili fillimisht u shpreh: "Faza përgatitore ka ecur mirë, kemi bërë miqësore dhe kanë shkuar mirë. Ekipi është paraqitur shumë mirë, kemi bërë edhe lojëra të bukura, duke arritur edhe rezultate. Por, kjo nuk duhet të na kalojë në eufori në ndeshjet e kampionatit". Ndërsa i pyetur për largimin e ishkapitenit Selmani, Gjoni u përgjigj: "Ai kishte krijuar një reputacion të tijin këtu, të gjithë kishim besim tek ai. I uroj suksese, por besoj që edhe ne do t'ia dalim". Sa i përket transfertës me Vllazninë, Gjoni u shpreh: "Laçi ka qenë përherë gati, jo vetëm tani që faza ka shkuar mirë. Jemi në rrugën e duhur për të bërë një kampionat të mirë. Që nga ndeshja hapëse e kampionatit me Vllazninë duhet të tregojmë që jemi aty për objektiva të mëdhenj".
ABDURRAHMAN FANGAJ Mbrojtësi Fangaj zbret të shtuan në "Loro Boriçi" me statusin e ishit. Në lidhje me situatën që po kalon skuadra dhe objektivat për premierën me Vllazninë, shkodrani i Laçit u shpreh: "Faza ka shkuar mirë, duke parë edhe rezultatet në ndeshjet miqësore, që kanë qenë të mirë, edhe pse rezultati nuk është primar. Trajneri ka bërë edhe modulin e lojës që do të luajë në kampionat dhe po përgatitemi. Kundër Vllaznisë? E dimë shumë mirë kush është Vllaznia dhe emri i saj, por ne shkojmë për të marrë aty 3 pikë".