Lleshanaku: Elbasani nuk është... autoshkollë
Trajneri vendos kushte: Nuk jemi ende gati, por në ekip dua vetëm elementë që vlejnë
Elbasani ka hyrë në javën e tretë të përgatitjeve, e cila në mungesë të afrimeve cilësore, është shfrytëzuar më së shumti për seleksionime. E megjithatë mbipopullimit do t'i vijë fundi këtë fundjavë, teksa do të bëhen edhe disa "skarcime". Kur duhet më pak se një muaj nga starti i sezonit të ri, duhet thënë se skuadra nuk është ende gati.
TRAJNERI - Për këtë periudhë përgatitjesh dhe për merkaton në vazhdimësi, flet në një prononcim për "Panorama Sport", trajneri Shkëlqim Lleshanaku. Tekniku elbasanas vlerëson punën e bërë deri më tani, por e pranon hapur se skuadra ka nevojë për përforcime në të gjitha repartet dhe pret që nga java e ardhshme të nisin edhe prurjet e para serioze. "Jam i kënaqur me ecurinë e ekipit në këto dy javë përgatitje, pasi nuk kemi pasur dëmtime dhe djemtë kanë punuar mirë. Për momentin janë afruar disa lojtarë, shumica të rinj në moshë, ku një pjesë e tyre kanë aftësi të mira. Në fund të javës kemi vendosur për të bërë seleksionimet", u shpreh fillimisht Lleshanaku. Në lidhje me kampionatin dhe merkaton, ai vijon: "Duhet të jem realist dhe të them se akoma nuk jemi gati për kampionatin, por deri në startimin e tij po punojmë dhe besoj se do të jemi gati. Sa i përket merkatos, edhe skuadrat më të mira në botë kanë nevojë për të, jo më ne. Vetëm se tani pretendojmë që të vijnë lojtarë me cilësi të mira, sepse Elbasani nuk është autoshkollë dhe të vijë çdokush për t'u stërvitur. Ai që do të vijë, duhet t'ia vlejë. Mendoj se me pesë lojtarë në të gjitha repartet kompletohemi, sidomos në mesin e fushës ku kemi më shumë nevojë", përfundoi tekniku elbasanas, i cili ka marrë drejtimin e skuadrës në një moment të vështirë. Ndërkohë, ditën e sotme skuadra ka programuar një tjetër miqësore, kësaj here me ekipin e Shkumbinit në Peqin. Edhe në fundjavë pritet që verdheblutë të luajnë një tjetër sfidë miqësore, për të parë edhe njëherë kontingjentin që po stërvitet aktualisht.