S'ka konkurrencë e cilësi, klubi i var shpresat te të... huajt
Merkato pezull, sot miqësore me Orikumin
Në Fier janë të përqendruar në merkato, po aq sa edhe në rritjen e grupit. Në mbrojtje ka nevojë për lojtarë të mirëfilltë, sidomos nga krahët; mesfusha ka organikë me shumicë, por priten edhe të tjera lëvizje; ndërsa sulmi është gjithashtu një pikë nevralgjike për Apoloninë. Siç e ka thënë vetë ai në deklarata të mëparshme, ofensiva e skuadrës ka numra, por duhet rritur konkurrenca dhe cilësia. Gjatë kësaj vere Apolonia ka bërë 4 përforcime: Erisildo Smaçi dhe Gelando Sharavolli në mesfushë, Klejdis Branica dhe Jeton Krasniqi në sulm (që më shumë mund t'i shërbejë skuadrës U-19, që këtë sezon do të luajë në Superligë). Ndërkohë, shkon drejt nënshkrimit edhe mesfushori fierak Sokol Ymeraj, pasi të bëjë zgjidhjen formale të kontratës me Flamurtarin e Vlorës, ku është aktivizuar vjet. Për momentin, veç disa lojtarëve të rinj, tek Apolonia vijon provën mbrojtësi francez Baraxhi dhe sot do të fillojë testimin edhe ekuadoriani 23-vjeçar Maskuera, që mund të luajë në krejt linjën e majtë.
TË HUAJT - Gjatë kësaj vere janë testuar 4 të huaj, tanimë të larguar: nigerianët Abraham Xhon Ekeleme e Abdulxhabar Etudaije, kamerunasi Frank Valeri Boni dhe amerikani Dankuan King, teksa vazhdon të jetë në provë francezi Baraxhi dhe do të nisë provën ekuadoriani Jose Andres Salazar Maskuera, i cili mund të bëjë "xholin" për Apoloninë. Në fund të kësaj jave priten edhe dy ekuadorianë të tjerë, përkatësisht një mbrojtës i djathtë dhe një qendror, teksa menaxherët e skuadrës po punojnë për të sjellë 3 brazilianët, apo edhe 2-3 futbollistë cilësorë nga kampionatet shqiptare.
MIQËSORJA - Apolonia do të luajë sot në orën 17:30, ndeshjen e gjashtë miqësore. Pas pesë testimeve të para të zhvilluara në transfertë, fierakët do të presin sot në Fier Orikumin. Ndeshja do të luhet në mjediset e akademisë, pasi stadiumi "Loni Papuçiu" është në shtrim e sipër të tapetit të ri. Me këtë kundërshtar janë ndeshur edhe një herë tjetër gjatë përgatitores, ndërsa kujtojmë se në transfertë barazuan në shifrat 1-1.