Milan, blerjet e reja premtojnë “qiellin”
Nga mbrojtja në sulm, tre "djajtë" tregojnë objektivat
Edhe sivjet ishte një revolucion i radhës, por ndoshta, ndryshe nga sezoni i kaluar, këtë herë edhe blerjet e bëra duken disi më të përqendruara, me një mision konkret për të tashmen dhe të ardhmen. Milani i ri i Paolo Maldinit me shokë ka vepruar në merkato, duke
afruar lojtarë të rinj e me perspektivë, ndoshta emra jo shumë të njohur për pjesën më të madhe të tifozëve, por me shumë perspektivë dhe me shpresa të mëdha. Madje, kurrikulumet e tyre janë aq pozitive, sa në një të ardhme të shpejtë, me futbollistë si Leo Duarte, Ismael Benaser dhe Rafael Leao, mund të mbushen bindshëm edhe arkat e klubit. Gjithsesi, nëse kjo ditë do të vijë ose jo, kjo është diçka për t'u parë, por ndërkohë mbrojtësi i ardhur nga Flamengo, mesfushori i blerë nga Empoli dhe sulmuesi nga Lila premtojnë të bëjnë gjëra të mëdha. Objektivi është një dhe i vetëm: t'i dhurojnë Milanit "qiellin", ndoshta jo stratosferën, ku aty luajnë Juventusi, Napoli e Interi, por të paktën atmosferën, atë rikthim në Champions, që sezonin e kaluar sfumoi vetëm në sekondat finale të javës së fundit të Serisë A. Nëse me Duarten dhe Benaserin repartet e mbrojtjes dhe mesfushës kuqezi duken më shumë sesa të kompletuar, në sulm, afrimi i Leaos ndoshta nuk do të mjaftojë, duke parë edhe faktin që drejtori teknik, Paolo Maldini, vazhdon të jetë në kërkim të një tjetër futbollisti ofensiv. Gjithsesi, Leao, në prezantimin e tij premton që të zgjojë nga "gjumi" bomberin Kristof Piontek, i cili e mbylli këtë tur veror me zero gola. Ndërkohë, Duarte nënvizon se do të kërkojë që të ecë në gjurmët e Tiago Silvës, ndërsa Benaser është gati që të marrë përsipër të gjitha përgjegjësitë në mesfushë që do t'i kërkojë trajneri Xhampaolo.