Mauro ndërron shtëpi dhe... kërkon 7-ën
Ditët kalojnë, merkatoja po shkon drejt mbylljes, por dëshira e Mauro Ikardit mbetet e njëjta: qëndrimi tek Interi. Një arsyetim i kthjellët, aq sa ka zgjedhur edhe një numër të ri fanelle, i dashur për të thuajse sa 9-ta. Menjëherë pasi ka zbuluar vendimin e klubit për Lukakun, që mori numrin në fjalë, argjentinasi, sipas raportimeve nga Italia, ka kërkuar 7-ën, të njëjtin që mban në kombëtare. Lëvizje që mund të krijojë edhe një çështje të brendshme: nëse Aleksis Sançez do të vishej zikaltër, do të duhet të zgjidhte një tjetër stampë pas shpine. SHTËPI E RE - Ikardi, pra, dëshiron qëndrimin dhe kërkon të punojë në 100% të stërvitjeve me grupin nën urdhrat e Antonio Kontes. Ndërkohë, ka postuar në "Instagram" foto nga shtëpia e re, e cila gjendet në… Milano. Ndërsa kërkesa kundrejt klubit, që do të arrihet ndoshta përmes Kolegjit Arbitral me ndërmjetësimin e një avokati, do të jetë marrja në konsideratë si një lojtar i Interit, duke apeluar artikullin 7 të akordit kolektiv të futbollistëve, ku parashikohet se çdo atlet duhet të stërvitet në kushte barazie, pa diskriminime apo diferencime. JUVJA DHE NAPOLI - Përtej rrugëve ligjore, deri në 2 shtator nuk përjashtohet asnjë hipotezë. Ish-kapiteni interist ka marrë, ndërkohë, një ofertë nga Napoli, destinacion i pëlqyer në rast se Interi do t'i mbyllë përfundimisht dyert Juventusit. Megjithatë, "axurrët" nuk po plotësojnë tërësisht kërkesën prej 70 milionë eurosh (propozojnë 65 ose para plus kartonin e Milikut) dhe do të presin një përgjigje të sulmuesit deri të dielën për të pasur kohë në çdo rast për gjetjen e një alternative.