Nejmar, zbardhet oferta e Barçës, huazim dhe 160 mln
Bartomeu ofron 62 milionë më pak se e shiti, por në 2020-ën
Dëshira e Nejmarit për t'u rikthyer në "Camp Nou" duket se po plotësohet, edhe pse gjërat po lëvizin shumë ngadalë. Juventusi dhe Reali i Madridit qëndrojnë gjithnjë pas, gati për të përfituar nga rezistenca që po bën PSG për të lënë të rikthehet në Barcelonë yllin brazilian. Gjatë takimit të së hënës, drejtuesit e kampionëve të Spanjës vendosën të paraqesin edhe ofertën e fundit me shkrim në Paris, e cila do të jetë me formulën e huazimit dhe mundësinë për ta transferuar 27-vjeçarin në verën e 2020-ës. Katalanasja "Sport" zbulon edhe shifrat e këtij operacioni. Barcelona do të kërkojë huazimin e sulmuesit për një sezon dhe qershorin e ardhshëm është gati t'i ofrojë PSG-së 160 milionë euro, edhe pse nuk dihet ende nëse e blerja do të jetë me detyrim apo jo. E qartë është se Barça nuk mund t'ia lejojë vetes të shpenzojë kaq shumë para duke qenë se ka investuar 250 milionë euro deri tani në merkato për të transferuar Grizmanin, De Jongun, Neton dhe Firpon. Katalanasit janë optimistë se me këtë ofertë, ata do të mposhtin konkurrencën e Realit dhe Juventusit. Sinjale pozitive vijnë edhe nga Franca. "L'Equipe" citon një burim të klubit francez, i cili thotë se PSG nuk do ta përjashtonte edhe një huazim të futbollistit me të drejtë blerjeje verën e ardhshme. "Jemi të hapur për çdo mundësi. Gjithsesi, ideja
është që jo thjesht të arrijmë një marrëveshje, por të sigurojmë plotësimin e kushteve të kërkuara financiare". PSG duhet ende të ekuilibrojë shifrat për shkak të "Fair Play-t Financiar", por këtë verë nuk ka tërhequr vëmendjen e UEFAs, duke qenë se ka bërë një
merkato të qetë. Por kjo nuk do të thotë se Barcelona duhet të flejë mbi dafina. PSG nuk është e detyruar të nxitojë për ta shitur yllin e saj dhe Reali monitoron situatën me vëmendje, ndërsa Juve po përdor një kartë më të fortë, atë të Paulo Dibalës.