“Feti Borova” hap dyert, Shima: E mbyllim me fitore
Kapiteni: Ditë të vështira, t'i kthejmë në energji pozitive
Më në fund salla sportive "Feti Borova" ka hapur dyert për Kombëtaren e basketbollit të meshkujve. Ekipi kuqezi i trajnerit Bilali ka zhvilluar dje seancën e fundit stërvitore në kuadër të përgatitjeve për ndeshjen paraeliminatore ndaj Danimarkës, sfidë e cila do të luhet sot në orën 19:00. Një kontratë e pafirmosur ndërmjet Agjencisë së Parqeve dhe Rekreacionit (APR, institucion që administron Parkun Olimpik) dhe FSHB, bëri që Kombëtarja e basketbollit mos të lejohej të stërvitej në këto ambiente. Një situatë anormale dhe e turpshme që rëndoi në "kurriz" të ekipit, i cili ishte i detyruar të udhëtonte çdo ditë drejt Durrësit për t'u stërvitur në akademinë Goga Basket. Por le të kthehemi te basketbolli i luajtur, aty ku sot Shqipëria do të ulë siparin e paraeliminatoreve
në takimin ndaj kombëtares daneze. Do të jetë një sfidë që do të ketë vetëm vlerë statistikore për të dyja ekipet, pasi Danimarka tashmë e ka siguruar vendin e parë dhe kualifikimin, ndërsa Shqipëria mbyll grupin e tretë. Megjithatë, kuqezinjtë do të kërkojnë ta mbyllin me fitore, ashtu sikurse deklaron edhe kapiteni Gerti Shima. Flet kapiteni Shima
Në një prononcim për "Panorama Sport", kapiteni i Kombëtares kuqezi, Gerti Shima, flet para sfidës ndaj Danimarkës: "Situata për ta përgatitur këtë ndeshje nuk ishte aspak e mirë, e kjo nuk është hera e parë që na ndodh. Por jetojmë në Shqipëri dhe ky është realiteti këtu. Shpresojmë që atë energjinë negative që kemi pasur gjatë këtyre ditëve ta kthejmë në pozitivitet, duke zhvilluar në radhë të parë një lojë të mirë, e pse jo të marrim një fitore që na mungon prej më shumë se 2 vitesh, kur mundnim Sllovakinë. Mua personalisht kjo situatë më ka mobilizuar edhe më shumë, e shpresoj të ketë mobilizuar të gjithë grupin e lojtarëve, ndonëse këto ditë kanë qenë të lodhshme për të gjithë", përfundoi Shima.