Feston Vllaznia, zhgënjen Laçi
Kurbinasit pa ide dhe grintë në "Loro Boriçi", bëjnë shumë pak për objektivin titull
Vllaznia feston rik thimin në elitë me fitore. Ka mjaftuar një supergol i brazilianit Hygor Guimaraes Goncalves, për t'u dhënë trepikëshin e parë sezonal shkodranëve. Start më të mbarë nuk mund të kishte as për maqedonasin Mirsad Jonuz në krye të stolit. Kuqeblutë funksionuan në bllok, ndërsa loja bindëse u shoqërua edhe me raste të shumta. Kruja shkëlqeu me inkursionet e tij nga e majta, Silvio Zogaj i dha bukuri lojës me kundërsulmet e tij plot klas, ndërsa mesfushori i ardhur nga vendi i "sambas" me atë goditje perfekte ngriti peshë 3500 të pranishmit në stadium. Kurbinasit nga ana tjetër, zhgënjyen. Në "Loro Boriçi" u pa një ekip pa shumë ide dhe grintë, duke qenë shumë larg objektivit titull, të vendosur pas paraqitjes së mirë në Europë dhe miqësoreve të verës. Bardhezinjtë çaluan nga krahët, ndërsa sulmi edhe ato pak raste që pati nuk diti as t'i shfrytëzonte. PJESA E PARË
Vllaznia shfaq ritëm direkt dhe pa kaluar as dy minuta e sheh veten në sulm. Kruja harkon një top perfekt nga goditja e këndit, por gjuajtja e Shtubinës nuk ka shënjestrën e duhur. Vendësit shtojnë presingun me anë të Gurishtës, i cili hedh një top perfekt në zonë për Krujën. Ky i fundit provon të bëjë befasinë me një gjuajtje akrobatike, por nuk koordinohet siç duhet. Në të 7-ën minutë është sërish Shtubina që rrezikon dhe këtë herë i bën bllokadë Domgjoni. Rasti i parë serioz për Laçin vjen në të 20-ën, kur Lushkja provon me një goditje potente në hyrje të zonës. Sherri edhe pse shfaq pasiguri, topin e devijon në korrne. Në të 28-ën Turkaj niset shpejt nga e majta dhe hyn në zonë, duke provuar edhe një krosim, por mbrojta vendëse neutralizon gjithçka. Minutat në vazhdim janë të "zbehura", ndoshta të ndikuara edhe prej vapës. E megjithatë, në të 42ën ka drithërima në portën e miqve. Kruja provon me një goditje në hyrje të zonës, por Stazhilla bën shpëtimtarin. Sapo nis e para minutë shtesë, shpërthen festa në "Loro Boriçi". Braziliani i ardhur vetëm një javë më parë në Shkodër, lëshon një predhë nga afro 22 metra dhe topi pas një devijimi të lehtë të Lushkjes, përfundon drejt e në trekëndëshin e Stazhillës. PJESA E DYTË
Loja rinis pa ndryshime në 11-shet respektive dhe shumë herë më e qetë. Iu desh pak kohë Vllaznisë që të
shfaqej në sulm dhe në të 60ën mendoi Kruja që të jepte spektakël duke depërtuar bukur nga e majta. Kaloi fillimisht Deliun dhe i dha atë top të artë Likës, por e majta e kapitenit shkoi vetëm jashtë. Me kalimin e minutave, kurbinasit fitojnë
terren dhe mundohen që të barazojnë. Lushkja i jep një top perfekt Xhixhës në të 66ën, por sulmuesi shpërdoron. Edhe pse jo më larg se 11 metra nga kuadrati, e dërgoi vetëm jashtë. Laçi nuk pranon rezultatin dhe zhvendoset totalisht në
sulm, por pa pasur qartësinë e duhur në vijën e parë. Në të 80-ën është H.Marku që provon me një gjuajtje nga distanca, e megjithatë topi kontrollohet në dy kohë prej portierit moldavit të kurbinasve. Krijohet iluzioni i golit dy minuta më vonë. Lushkja harkon në zonë për Xhixhën, i cili provon me një gjuajtje të bukur, por ndërhyrja e Sherrit ishte vendimtare. Në të 84-ën mendon Gurishta të bëjë heroin, duke shpëtuar skuadrën nga një gol thuajse i sigurt i Xhixhës. I fundit rast për t'u shënuar, është ai i një minute më vonë, kur Domgjoni tenton të shënojë me kokë, por pa gjetur kuadratin. Minutat e mbetura dhe shtesa shoqërohen me një menaxhim të mirë të rezultatit nga ana e shkodranëve, që hera-herës shfrytëzuan edhe... vonesat.