Burreli përmbys Tërbunin, afron dy brazilianë

Tërbuni dhe Burreli u përballën dje për herë të dytë në një ndeshje miqësore. Ndeshja e luajtur paradite në Pezë-Helmës përfundoi me fitoren e matjanëve, 1-2. Tërbuni e nisi vrullshëm takimin dhe shënoi pas 8 minutash me Veriun, i cili realizoi pas një krosi të Mahmutajt. E gjithë pjesa e parë është dominuar nga pukjanët që krijuan raste të tjera për ta dyfishuar rezultatin, por nuk ia arritën qëllimit. Me fillimin e pjesës së dytë, dy trajnerët bënë shumë ndërrime. Tërbuni shpërdoroi edhe disa raste të tjera, kurse Burreli, me dy kundërzbritje në fundin e ndeshjes, arriti ta përmbyste rezultatin në 1-2. Për matjanët shënuan Farruku në minutën e 78-të dhe braziliani Santana në të 89-ën, duke përfituar edhe nga gabimet në mbrojtje të Tërbunit. Santana është një nga dy brazilianët e afruar së fundmi tek ekipi matjan. Duhet theksuar se kjo miqësore është zhvilluar në temperatura të larta, megjithatë ishte e fortë, pasi lojtarët dhanë gjithçka në fushë dhe bënë edhe gabime. Nuk luajti për Tërbunin mesfushori Saliaj, i cili duket pranë largimit nga ekipi.

TRAJNERËT - Pas ndeshjes, trajneri i Tërbunit, Oltijon Kërrnaja, tha: "Ekipi po konsolidohet gradualisht. Në këtë ndeshje u detyrova të bëj shumë zëvendësime edhe për shkak të temperaturave të nxehta. Ekipi po merr formë dhe e rëndësishme është që Tërbuni po paraqitet mirë. Jemi zhbllokuar në sulm, por mendoj se na duhet edhe një qendërmbrojtës për të mbyllur merkaton". Kurse trajneri Gentjan Stojku, u shpreh: "Për mua është fillimi me ekipin e Burrelit, kjo ishte ndeshja ime e parë në krye të tij. Tërbuni dominoi në lojë dhe duhet të them se ka formuar një ekip të fortë, por ne shënuam në fund dhe arritëm ta fitonim ndeshjen".