Besëlidhja zbavitet me Veleçikun, dopieta të Gjorgjeviç dhe Hajdarit
Lezhjanët fitojnë miqësoren me koplikasit
Besëlidhja ka fituar thellë ndaj Veleçikut në Lezhë, ku protagonistë ishin Gjorgjeviç dhe Hajdari me nga 2 gola. Lezhjanët nuk u treguan agresivë në fillim, megjithatë goli i tyre nuk do të vononte. Në të 17-ën, Besëlidhja realizoi me Gjorgjeviç, i cili dribloi mbrojtjen e Veleçikut dhe gjuajti saktë. Miqtë u munduan të organizoheshin, por pa rezultat. Pas disa rastesh, Gjorgjeviç dyfishoi të 35-ën dhe pjesa e parë u mbyll 2-0. Vendësit shpërdoruan një mundësi të mirë sapo nisi pjesa e dytë, ndërsa Veleçiku reagoi me anë të Fikajt. D.Çokaj fitoi një penallti në minutën e 50-të dhe te pika e bardhë u shfaq Ujka, i cili goditi traun e portës së Besëlidhjes. Pas këtij momenti nisën zëvendësimet te të dyja ekipet. Në fushë për lezhjanët është edhe Hajdari, i cili nuk fal në rastin e parë që i krijohet dhe tund rrjetën veleçikase. Miqtë i intensifikuan aksionet e tyre sulmuese, por pa mundur ta vinin në vështirësi portierin lezhjan. Berisha për Besëlidhjen shpërdoron një rast ideal, i vetëm me portierin e Veleçikut. Borshi ekzekutoi një goditje dënimi nga rreth 30 metra dhe e vuri në vështirësi Likën, që e kontrolloi topin. Rica shërbeu saktë për Hajdarin të zbuluar në qendër dhe shkodrani gjuajti saktë duke katërfishuar rezultatin dhe duke fiksuar edhe ai një dopietë.
TRAJNERËT - "Në përgjithësi ekipi u paraqit mirë, repartet funksionuan. nuk ka rëndësi rezultati në miqësore, vlerësoj performancën e ekipit dhe të futbollistëve në veçanti. Koha në dispozicion besoj është e mjaftueshme për të riparuar defektet që po na shfaqen. Rëndësi ka që ekipi funksionon dhe po i zbaton detyrat mirë. Po formatojmë ekipin që dëshirojmë, Veleçikut i uroj suksese", tha pas ndeshjes trajneri i Besëlidhjes, Elvis Plori. Kolegu i tij, Besnik Duli, u shpreh: "Pas një punë intensive, vendosëm të luanim kundër Besëlidhjes për të parë gjendjen e futbollistëve. Jam i kënaqur pjesërisht, pasi nuk ishin aty ku kërkohet. Jemi në kulmin e ngarkesave fizike dhe kjo ndikon në paraqitjen e ekipit. Gjykimi ishte pjesa që nuk më pëlqeu, një sëmundje që nuk e di a do të ketë ndonjëherë shërim. Merkatoja jonë nuk është mbyllur, presim edhe futbollistë të tjerë nga Vllaznia. Objektivi është mbijetesa".