Festival golash dhe polemika, por në Firence fiton Napoli
Debuton Riberi, Ançeloti nervoz: Më ofenduan për 90 minuta
Ndeshja e dytë e ditës së parë të Serisë A ishte një spektakël më vete, së cilës nuk i mungoi asgjë: intensitet, festival golash dhe polemika. Gjithsesi, në fund ishte Napoli që fitoi 4-3 në Firence, përballë vjollcëve, edhe pse këta të fundit akuzojnë ashpër arbitrat për rezultatin final. Skuadra e Ançelotit arrin të mbajë hapin e Juventusit, pasi këta të fundit fituan në Parma dhe dueli i fundjavës së ardhshme pritet të jetë edhe më emocionues. Në "Artemio Franki", në 30 minutat e para, në fushë shihet vetëm Fiorentina, e cila zhbllokon me penallti, me Pulgarin, që në minutën e 9-të. Por, ishte Mertens ai që vendos të zgjojë Napolin, duke barazuar në të 38-ën dhe tërbon një qytet të tërë, duke fituar një penallti shumë të dyshimtë, të cilën Insinje e shndërron në gol, duke mbyllur pjesën e parë në 2-1. Në të dytën, Fiorentina barazon menjëherë me Milenkoviç (52'), por vetëm 4 minuta më vonë, Kajehon bën 3-2 për Napolin. Vjollcët nuk dorëzohen, por Boateng, i ardhur nga stoli, rikthen baraspeshën në të 65-ën, ndonëse Insinje bën dopietë, duke rikthyer avantazhin për të kaltrit vetëm pas dy xhirosh të kronometrit. Në minutat e fundit, ka vend edhe për debutimin e Riberisë, por francezi nuk mundi të ndryshonte fatin e ndeshjes.
Ançeloti, i turbullt - Karlo Ançeloti nuk ka dashur të hyjë në polemikat për penalltinë, por ka analizuar ndeshjen, duke u projektuar te dueli i radhës, ndaj Juventusit: "Morëm 3 pikë të rëndësishme, pasi në Firence nuk është asnjëherë e lehtë të fitosh, - bën hyrjen trajneri i Napolit. Unë i nervozuar? U ofendova për 90 minuta me radhë, por në fund, pas sfidës, nuk ngurrova që t'u tregoja disa prej injorantëve, të cilët më morën në shënjestër, që të shkonin në shtëpi. Ndërsa për pjesën tjetër, mund të them se Fiorentina ka një tifozëri fantastike. Penalltia e Mertensit? Nuk flas për arbitra, dua të shoh përpara. Sfida me Juven vjen me shqetësime? Është e vërtetë që pësuam 3 gola, por në të njëjtën kohë realizuam 4 në transfertë. Prandaj, kur dëgjoj se na duhet edhe një sulmues, mendoj se do të ishte më mirë nëse investojmë dhe presidenti më sjell një mbrojtës, sepse këtu kemi probleme. Ndërsa për sa i përket ndeshjes me Juven, skuadra do të jetë gati. E dimë se sa e rëndësishme bëhet që në javën e dytë ky rezultat, por mendoj se mund të bëjmë një tjetër paraqitje pozitive", tha Ançeloti.