Monako këmbëngul për Kesin, “Djalli” monitoron Uanijaman

Merkato, rokadë afrikanësh te kuqezinjtë

Monako vijon të mendojë seriozisht për Frenk Kesin dhe në orët e ardhshme mund të zyrtarizojë një ofertë prej 30 milionë eurosh për mesfushorin. Teksa në "Casa Milan" nuk pritet të bëjnë rezistencë, ai që ka dyshime lidhje me largimin është vetë futbollisti. Sipas "Sportmediaset", afrikani heziton sepse kërkon një klub të nivelit më të lartë se ai i Milanit, teksa edhe në aspektin e pagës pretendon shumë. Në raportimin mediatik, thuhet se Kesi dëshiron 4.5 milionë euro në vit, teksa kësaj page dëshiron t'i shtojë edhe disa bonuse të lidhura me paraqitjet dhe golat. Pretendimet e tij janë thuajse të barabarta me dyfishin e asaj që arkëton te Milani, por kjo është thjesht një kërkesë paraprake për të testuar vullnetin e francezëve. Pasi të marrin miratimin e Milanit, drejtuesit nga "Principata" do të ulen në bisedime me menaxherin e 22-vjeçarit, duke tentuar akordin për një rrogë më të përmbajtur. Mësohet se Monako është gati t'i garantojë 3.5 milionë euro në sezon, plus bonuse të ndryshme.

Alternativa - Nëse arrihet marrëveshja, Milani do të hidhet menjëherë në sulm për të afruar një mesfushor me karakteristikat e Kesit. Sipas portalit "Soçer Link", kuqezinjtë janë vënë në gjurmët e Viktor Uanijamas. Keniani është pranë largimit nga Totenhemi që ka një akord me Klub Bryzhin mbi bazën e 12 milionë eurove. 28-vjeçari ka marrë kohë për të pranuar ofertën belge, sepse pret edhe një lëvizje nga ana e Milanit. Nëse italianët këmbëngulin, mesfushori do të largohej nga "Spurs" me të njëjtët parametra transferimi si ato të arritura me Bryzhin. Uanijama, që në karrierë ka luajtur me Seltikun (2011-2013) dhe Sauthemptonin (2013-2016), aktualisht është kapiten i kombëtares së Kenias. Në sezonin e fundit ai ka grumbulluar 22 prezenca me Totenhemin duke shënuar edhe një gol.