Shqipëria, ja lista anti-Finlandë, Sinani presion rivaleve
Kombëtarja e Shqipërisë së femrave është gati që të nisë udhëtimin e saj për eliminatoret e Europianit U-21, me trajnerin e përfaqësueses, Vioresin Sinani, i cili ka zbardhur dje listën e 18 të grumbulluarave. Vajzat kuqezi do ta nisin në datën 2 shtator, në stadiumin "Elbasan Arena" aventurën e tyre, me duelin përballë Finlandës, por në Grupin E do të kenë si rivale edhe Skocinë, Portugalinë dhe Qipron. Në konferencën për shtyp, trajneri Sinani u shfaq jo vetëm optimist përpara debutimit, por nuk ngurroi që t'u bëjë presion edhe rivaleve, të cilat mund të mendojnë se do ta kenë të lehtë me vajzat e tij. "E nisim me Finlandën, ndonëse grupi është relativisht mjaft i vështirë, duke qenë se jo vetëm rivali që na pret në debutim, por edhe Skocia e Portugalia janë kombëtare elitare në futbollin e femrave. Në grup kemi dhe Qipron, por është një kundërshtar më se i kalueshëm. Për këtë ndeshje të parë kemi menduar të thërrasim një grup prej 18 lojtaresh. Kemi afruar edhe 3-4 elementë nga skuadra U-19 e edicionit të kaluar të cilat gradualisht besoj se do të arrijnë të përshtaten me ekipin dhe do të jenë një pikë e fortë në vitet në vijim. Po mundohemi të rinovojmë skuadrën, duke gërshetuar elementët e rinj me ato me më shumë eksperiencë. Në lidhje me Finlandën them se është një ndeshje e fortë, skuadrat skandinave e kanë rritur ndjeshëm cilësinë e futbollit të femrave, por ne kemi një ekip simpatik, një ekip solid, që në ndeshjet e fundit miqësore është paraqitur shumë mirë. Besoj shumë se mund të marrim një rezultat pozitiv. Në këto ditë grumbullimi, së bashku me vajzat do të studiojmë sfidat e Finlandës. Kemi parë si staf ndeshjen e tyre të fundit, janë një skuadër me përgatitje të mirë fizike, por kam besim se ne do të paraqitemi shumë mirë, pasi në dispozicion kam vajza që nuk dorëzohen kurrë dhe japin maksimumin dhe shpirtin në fushën e lojës. Prurjet e reja si Hila, Begallo, Lufo do të jenë e ardhmja e futbollit të femrave në Shqipëri dhe do të bëhen të rëndësishme gradualisht edhe për Kombëtaren. Vllaznia është baza e ekipit sot, ato kanë arritur një rezultat të shkëlqyer në Europë, duke u ndeshur me skuadrat më të forta të botës. Duhet t'i përgëzoj, është një arritje e madhe për futbollin shqiptar. Të arrish të ndeshesh me elitën e futbollit evropian, është diçka e madhe. I përgëzoj, nga presidenti te lojtaret, kanë bërë një punë të mirë. Vllaznia është klubi më i mirë në Shqipëri për futbollin e femrave. Lojtaret e grumbulluara e meritojnë dhe pritet ta luajnë me një kundërshtar të fortë Champions-in për femra. Dua të uroj dhe Mitrovicën që arriti rezultate të mëdha në Kupën e Kampioneve. Ashtu si edhe Vllazia, edhe Mitrovica na ka dhënë një bazë të rëndësishme në Kombëtaren shqiptare, shprehet Sinani, që më pas vazhdon. - Unë jam i kënaqur nga të gjitha vajzat, edhe nga ato që vijnë nga jashtë kufirit. Besoj se është një grup i mirë dhe një grup që unë e vlerësoj sepse japin gjithmonë maksimumin në çdo ndeshje. Ekipit do i injektojmë egon dhe shpirtin e garës për 90 minuta. Do të luajmë me skemat që kemi përdorur zakonisht. Nëse skuadra jep maksimumin në fushë, çdo ekip do ta ketë të vështirë kundër nesh. Jam i kënaqur dhe nga dy testet që kemi zhvilluar me Maqedoninë e Veriut në qershor. Kur ekipi jep më të mirën: vrapon, luan fort dhe tregon shpirt gare, unë si trajner mund të qëndroj shumë i qetë. Besoj se me Finlandën do të zbresim me shpirtin e duhur në fushë. Pres një fazë mbrojtëse të fortë, një mesfushë të kujdesshme dhe saktësi në kundërsulme. Unë jam i bindur se do të përfaqësohemi mjaft mirë në këto eliminatore".