Abazaj titullar, ja si ndryshon Kukësi i Duros
Paradokset e vendimeve të marra nga komisioni përkatës
Menjëherë pas fi tores në Gjirokastër, trajneri i Partizanit, Franko Lerda, nisi punë me ekipin për ndeshjen e radhës, ku nesër presin Flamurtarin në "Selman Stërmasi". Theofilus Solomon nuk luajti ndaj Luftëtarit, pasi ishte i pezulluar nga kartoni i kuq që mori ndaj Kukësit. Ai ishte llogaritur që do të rikthehej për vlonjatët dhe në dy seancat e para stërvitore ishte në plane për këtë sfidë. Por, dje Partizani ka marrë një goditje nga Komisioni i Disiplinës, i cili është kujtuar të shqyrtojë ndodhitë e 90 minutave të para në prag të javës së tretë, duke e dënuar sulmuesin e kuq me dy ndeshje pezullim. Të njëjtin dënim me Solomonin ka marrë edhe mbrojtësi i Kukësit, Bruno Luajt, me të cilin u përplas sulmuesi në minutën e 62-të të takimit, fiks 17 minuta pasi 23-vjeçari kishte hyrë në fushë. Motivacioni ka qenë i përbashkët: Për lojë të rëndë ndaj kundërshtarit. Ky vendim i disiplinës i ka tërbuar "demat", të cilët kanë vetëm një seancë në dispozicion për të ndryshuar planet për Flamurtarin pas shtimit të pezullimit për sulmuesin nigerian.
SI LUAN NIGERIANI
Praktikisht, Theofilus Solomon e ka humbur ndeshjen me Flamurtarin pas dënimit me dy javë nga disiplina. Por, mbetet një dritare e hapur për aktivizimin e 23vjeçarit, pasi dihet se ai e ka shlyer gjysmën e dënimit, duke mos luajtur ndaj Luftëtarit. Partizani mund të ketë nesër shërbimet e nigerianit nëse pjesën e mbetur të dënimit e shlyen me gjobë, ku i bie që të paguajë rreth 1 milion lekë në FSHF. Sot pritet që drejtuesit e klubit së bashku me stafin teknik të vendosin për Solomonin, do të paguhet gjoba që të luajë apo do ta lënë që ta kryejë të plotë pezullimin. Duke ditur kundërshtarin që kanë përballë dhe organikën e plotë, gjasat janë që Solomon ta shikojë nga tribuna sfidën me vlonjatët.
GAFA
FSHF insiston që klubet të jenë serioze dhe të plotësojnë rregulloret, por janë instanca pranë këtij institucioni që e nisin vetë punën me gafa. I tillë ishte vendimi i djeshëm i Komisionit të Disiplinës që kujtohet të shqyrtojë problemet javës së parë, një ditë para startit të javës së tretë. Që këtu shikohet serioziteti i këtij institucioni, i cili mbase i ka mbarur me vonesë pushimet.
VENDIMET DYSHUESE
Disiplina jo vetëm që e nisi punën me vonesë, por edhe me vendime dyshuese, duke legalizuar që në start aktet antisportive. Solomon e Lulaj u ndëshkuan me të njëjtën masë ndëshkuese, ndonëse nigeriani ishte iniciatori, por edhe e vazhdoi protestën pas ndëshkimit te zyrtarët e ndeshjes. Pra, Lulaj mbase nuk mund të dënohej njëlloj si Solomon. Më dyshuese ishte përkëdhelja për incidentet që ndodhën në ndeshjen Tirana-Teuta, që u vlerësuan me një gjobë 50-mijëlekëshe. Dihet që në këtë takim tifozët goditën me shishe dy herë arbitrin anësor, ku u ndërpre edhe loja. Me sende u goditën edhe lojtarë kundërshtarë. Ndaj, që në start disiplina vë një standard dyshues, duke inkurajuar veprimet antisportive në stadium.