Shënon Perisiç, Bajerni luan “tenis” me Maincin
Blaugranët vuajnë mungesat, Grizman spektator
Osasuna i ka dhënë një tjetër shuplakë Barcelonës dhe i jep mesazhin që duhet të jetë e vëmendshme në këtë fillim kampionati. Në Bilbao katalanasit humbën, ndërsa në "Pamplona" nuk ia dolën të shkonin më shumë sesa një barazim ndaj një rivali që nuk humbet prej 27 ndeshjesh në shtëpinë e saj. Ernesto Valverde ka lënë 5 pikë dhe tani shpreson që Leo Mesi të rikthehet sa më shpejt në fushën e lojës. Mund të kishte shkuar më keq e gjithë situata, në rast se talenti Ansu Fati nuk do të kishte shkëlqyer në pjesën e dytë. Është vetëm 16 vjeç dhe ka shumë uri dhe dëshirë për futboll. Debutoi një javë më parë kundër Betisit dhe në 15 minuta mund të shënonte dy gola. Në "Pamplona" u aktivizua në pjesën e dytë dhe 5 minuta nga aktivizimi shënoi një supergol me kokë, duke i vjedhur kohën Naço Vidalit. Pjesa e parë për Barcelonën nuk ishte aspak e mirë, por në të dytën ndryshoi falë performancës së djaloshit. Ansu Fati është një futbollist ndryshe dhe meriton vazhdimësi.
Pjesa e parë e Barcelonës ishte pak a shumë si në Bilbao, por me ndryshimin e vetëm që Atletiko nuk shënoi, ndërsa Osasuna po. Ekipi katalanas po vuante në mesfushë dhe Grizman ishte thjesht një spektator, ashtu si në ndeshjen e parë. Asnjë goditje në portë nga katalanasit në 45 minutat e para, ku mungesat e Mesit dhe Suarezit ndihen. Presioni i lartë i vendësve ishte asfiksues dhe as lojtarët si De Jong dhe Buskets nuk mund që ta nxirrnin dot topin. Hordi Alba gaboi dhe Osasuna nuk fali duke shënuar me Roberto Torresin.
E SHTANG OSASUNA REAGIM DHE BARAZIM
- Pjesa e dytë ishte më e mirë, por jo e shkëlqyer. Fati dhe Artur Melo dhanë shkëndija dhe shënuan golat që mund të përmbysnin ndeshjen. Braziliani nxori ekipin përpara me klasin e tij dhe u krijua ideja se fitoi siguri për t'u larguar me 3 pikë. Por, një aksion i befasishëm i Osasunës solli një penallti pas prekjes së topit me dorë nga Pike. Roberto Torres shënoi nga pika e bardhë dhe barazoi ndeshjen. Barcelona nuk ia del që të ruajë hapin e një jave më parë, por mund t'i kënaqet vetëm performancës së talentit Ansu Fati. E vetmja gjë që i shpëton një pasditeje të errët.