Teuta shpërthen kundër Luftëtarit
Kryevepër e Avdylit, zhbllokohet edhe sulmuesi Nikaç. Goli i Filit nuk mjafton për bluzinjtë
Teuta shpërthen ndaj Luftëtarit dhe ndan me Tiranën përkohësisht kreun e renditjes. Skuadra e Bledi Shkëmbit ka qenë cinike në ndeshjen e djeshme dhe pavarësisht rezultatit 3-1, loja e durrsakëve ka shfaqur luhatje, madje duke e futur ndeshjen në situata të rrezikshme. Gjirokastritët ishin disi të pafat, pasi e nisën takimin duke goditur traversën, e më pas e pësuan tri herë prej gabimeve foshnjarake në mbrojtje. Florent Avdyli shënoi një supergol pas një goditjeje me të majtën nga rreth 25 metra, ndërsa u zhbllokua pas tri javësh kampionat edhe sulmuesi Darko Nikaç. Sefte për këtë sezon e bëri edhe mesfushori shkodran, Uendi Vecaj, ndërsa goli i Realdo Filit ishte shumë pak për bluzinjtë, të cilët vuajtën shumë dobësinë e repartit mbrojtës. PJESA E PARË
Start me ritëm të lartë në Durrës, ku fillimisht është Lorenco Vila që ka mundësinë më të mirë për të shënuar, por gabon para portierit. Kundërpërgjigjen menjëherë gjirokastritët, që me anë të sulmuesit Andi Renja, godasin traversën. Janë minuta të mira për miqtë, të cilët dalin mirë nga krahët e sulmit, duke u bërë rrezik konstant me Filin, Renjën dhe Likën. Teuta nuk del në lojën e vet për shumë minuta dhe shpesh te të besuarit e Shkëmbit ka shenja nervozizmi. Megjithatë, një aksion model ndryshon gjithçka si me telekomandë. Kombinimi Avdyli-Todorovski-Nikaç finalizohet me golin e këtij të fundit. Teuta merr zemër dhe krijon presion të vazhdueshëm edhe pas avantazhit, ndërsa gjirokastritët duken të shthurur në mbrojtje. Dushkaj, Isufi, Lala dhe greku Prikas e kanë të vështirë të lexojnë si duhet aksionet e vendësve. Goli i dytë i Teutës vjen afër fundit të pjesës së parë, ku pas një devijimi të gabuar të holandezit Hilgen, Vecaj nuk fal. Me 2-0 "djemtë e detit" shkojnë të qetë në dhomat e zhveshjes. PJESA E DYTË
Trajneri i Luftëtarit, Klodian Duro, largon Dushkajn dhe Renjën, për të hedhur në fushë Ahmetajn e Oshafin. Reagimi i bluzinjve nuk ka forcën e duhur dhe për të vulosur fitoren e Teutës mendon Avdyli me një "predhë" nga distanca. Rezultati 3-0 kaloi në eufori durrsakët, që menduan se ndeshja kishte përfunduar, por Luftëtari reagoi menjëherë pas aktivizimit të sulmuesit holandez, Angelmo Vyent. Ky i fundit i jep një asist
Filit, që shkurton diferencën, e më pas i afrohet golit të dytë. Gjirokastritët dominojnë në 20 minutat e fundit, ndërsa Teuta administron rezultatin dhe kap disa herë në befasi Luftëtarin përmes kundërsulmeve. Megjithatë, gjithçka u mbyll me shifrat 3-1.