Daja: Start i papritur, por pres fitoren e tretë
"Bylisin e njoh mirë, duhet të djersitim shumë në këtë takim"
Në javën e tretë të Kategorisë Supe riore, Skënderbeu kërkon fitoren përballë Bylisit, për të vijuar kryesimin e kampionatit. Bardhekuqtë luajnë takimin e radhës në shtëpinë e tyre përballë Bylisit të sapongjitur në elitë, por kjo për Ilir Dajën nuk do të thotë se është një ndeshje e thjeshtë. Trajneri kryeqytetas ka kërkuar nga ekipi i tij përqendrim maksimal, duke shfrytëzuar momentin e mirë që po kalojnë të tijtë. Nga ana tjetër, numri një i pankinës korçare ka përgëzuar futbollistët e tij për impenjimin në dy takimet e para, teksa thekson se falë cilësisë së të rinjve dhe eksperiencës së disa senatoreve, ky Skënderbe mund të vijojë ecurinë pozitive.
Dy ndeshje gjashtë pikë, e kishit menduar se pavarësisht situatës do të ishit këtu pas javës së dytë?
Tani çdo ndeshje i ka të tria rezultatet dhe kjo është normale. Por të them të vërtetën nuk e kishim menduar se do të ishim në këtë pozicion për vetë faktin se në dy ndeshjet e para kishim vështirësi. Por jemi të lumtur se për aq sa kemi treguar në fushën e lojës, kemi dhënë sinjale të mira, si ndaj Flamurtarit, ashtu edhe në Laç. Kjo do të thotë se ky ekip e ka mentalitetin e fituesit.
Mentaliteti është më i rëndësishëm se cilësia sipas jush?
Pa dyshim që janë të gjitha bashkë të rëndësishme. Duhet të ketë ndërthurje, por në këto momente komponenti psikologjik është më i rëndësishmi.
Ndeshja e radhës ndaj Bylisit, sa e vështirë është?
Pa u fshehur, Bylisin e njoh mirë pasi ka një ekip që prej gati dy vitesh luajnë bashkë. Me pak ndryshime në këto dy vite dhe ka një mënyrë loje të konsoliduar. Prandaj, nëse duam të shkojmë drejt fitores, duhet të ulemi me këmbë në tokë, t'i harrojmë dy sfidat e para, të djersitim shumë dhe të funksionojmë si grup, pasi ende manovrën nuk e kemi të konsoliduar. Mbështetemi te lojtarët me eksperiencë.
I qëndroni faktit se ekipi fitues nuk ndryshon?
Në përgjithësi ekipi që fiton, nuk ndryshon dhe në përqindjen më të madhe nuk do të ndryshojmë asgjë. Në bazë të kundërshtarit mund të ndryshojmë manovrën. Mendoj se duhet të jemi të qëndrueshëm gjatë gjithë kampionatit.
Si vjen Skënderbeu në ndeshjen e radhës ndaj ballshiotëve?
Entuziazmi është prezent dhe kjo është normale. Kemi pasur disa probleme të vogla fizike, por e rëndësishme është që moralisht jemi mirë. Çdo ndeshje vlen tri pikë dhe duhet të bëjmë punën
edhe në vazhdimësi.
Duke parë problemet e sezonit, a do të vinit bast se pas dy javësh do të kishit pikë të plota?
Unë do të thosha se kemi marrë maksimumin për aq kohë sa kemi pasur në dispozicion, për grupin që kemi pasur në dispozicion. Mendoj se me afrimet që kemi bërë, kemi shtuar rivalitetin në grup, por gjithsesi jam i mendimit se lojtarët kryesorë do të ndihmojnë lojtarët e rinj që të shtyjmë përpara këta elementë duke kërkuar në vazhdimësi.
Flamurtari, Laçi dhe Bylis. A është ky kalendari më i mirë i mundshëm?
Nuk ka ekipe që nënvlerësohen. Ne patëm vështirësi edhe me Flamurtarin. Çdo skuadër që nuk është në formën maksimale të krijon probleme duke qëndruar mbrapa. Nuk mundet të themi se është kalendari më i mirë i mundshëm.
Merkatoja e mbyllur, a jeni kënaqur?
Sigurisht, kemi biseduar shumë me presidentin dhe kemi bërë më të mirën e mundshme me aq sa kemi pasur mundësi.