Huazime pa fund, Kaçe te Larisa
Edi Reja e ka vendosur në listën e pritjes për sfidat me Francën dhe Islandën
Ergys Kaçe ndryshon sërish skuadër. Mes fushori i Kombëtares shqiptare, gjatë orëve të mbrëmjes së djeshme ka nënshkruar kontratën për të qenë pjesë e skuadrës së AEL Larisas për sezonin 2019-2020. Për futbollistin kuqezi, ky do të jetë sezoni i katërt që do të aktivizohet në formë huazimi.
TRANSFERIMI
Ergys Kaçe përfundoi sezonin e fundit me Panathinaikos, por kjo e fundit nuk shfrytëzoi mundësinë e blerjes. Në këtë mënyrë, Kaçe u rikthye te PAOK me të cilin zhvilloi edhe dy periudhat përgatitore në Holandë. Mirëpo, klubi kampion në fuqi i Greqisë nuk i dha shanse atij në kualifikueset për edicionin e ri. Kjo la në mënyrë të qartë të kuptohet se për shqiptarin nuk do të kishte vend në skuadër, teksa merkatoja duhet t'i ofronte atij një tjetër shans për të shpëtuar karrierën. Dje është mësuar edhe e ardhmja e mesfushorit shqiptar. AEL Larisa do të jetë ekipi me të cilin Kaçe do të tentojë që të fitojë një vend titullari, për të bindur dhe pse jo, për të kërkuar që kartoni i tij të blihet në mënyrë përfundimtare
nga PAOK. Shqiptari është huazuar edhe për një tjetër sezon nga skuadra e cila u shpall kampione e Greqisë në edicionin e fundit.
HUAZIMET
Teksa Edi Reja e ka lënë atë në listën e pritjes për dy
ndeshjet kualifikuese ndaj Francës dhe Islandës, Kaçe ka mësuar edhe destinacionin e ri për vitin në vazhdim. Për shqiptarin ky do të jetë sezoni i katërt që do të luajë në formë huazimi. Epanomis, Plzen dhe Panathinaikos janë skuadrat me të cilat ai ka luajtur i dhënë borxh nga drejtuesit dhe stafi teknik i PAOK. Në sezonin e fundit, me Panathinaikos ai u aktivizua në 20 ndeshje dhe shënoi 2 gola si dhe dhuroi 2 asiste në gjysmën e dytë të sezonit.