Ikardi, zbulohet dosja e akuzave kundër Interit
Marota kërkon "të pamundurën", ta transferojë te PSG ose Atletiko
Mauro Ikardi nis luftën me Inter in. Pra, jo më fjalë dashurie për zikaltrit. Ish-kapiteni dhe ish-numri 9, pasi refuzoi të gjitha klubet që kanë trokitur në dyert e "Suning"-ut, ka vendosur të hedhë një hap me peshë pak përpara mbylljes së merkatos, duke i kërkuar kolegjit arbitral rikthimin e menjëhershëm në pjesën taktike të stërvitjeve nga ku është përjashtuar që prej ditës së grumbullimit në Lugano, plus një dëmshpërblim prej 1,5 milionë eurosh, 20% të pagës. Apeli, i përmbledhur në një fashikull prej rreth 15 faqesh që do të hidhet poshtë në rast se Mauro do të largohej nga zikaltrit, ka mbërritur në zyrat ligjore të Interit tri mbrëmje më parë, duke habitur drejtuesit interistë, të cilët nga 8 korriku, ditën kur nisën seancat e para në Zvicër, nuk kanë lëvizur asnjë milimetër nga qëndrimi i mbajtur kundrejt sulmuesit argjentinas, pikërisht për të evituar vijimësi në rrugë ligjore.
LËVIZJE SURPRIZË
Por, ndërkohë ka pasur një lëvizje të papritur. Sulmuesi argjentinas ndihet i dëmtuar nga Interi dhe në apelim i është referuar pjesës së stërvitjeve të zhvilluara veças grupit: dëshiron të trajtohet si të tjerët. Një akt force në përpjekje për t'i vendosur më shumë presion klubit. Në të vërtetë, apeli është shumë i detajuar; duket thuajse sikur Mauro dëshiron që Interi të paguajë dhe të pranojë kushtet për ta lënë të lirë të largohet nga Milanoja me destinacion Juven, si pikë kulminante e "mundjes së dorës" të nisur 13 shkurtin e kaluar, kur klubi vendosi ta degradonte argjentinasin, duke i hequr shiritin e kapitenit në favor të Samir Handanoviçit. Stërvitjet veçmas me trajnerët e skuadrës U-19, ndeshjet e kontrollit 5 kundër 5 ku ai dhe Zhoao Mario përdoreshin vetëm si "sponde", përjashtimi nga "chat"-i i skuadrës ku komunikohen oraret dhe grumbullimet, plus nga fushatat e marketingut. Në faqet e apelit lexohet gjithçka, përfshi kronikën e detajuar të ditëve të argjentinasit në qendrën stërvitore "Appiano Gentile".
"JO" TË VAZHDUESHME
Gjatë kësaj kohe, argjentinasi ka refuzuar të gjitha ofertat e ardhura në drejtim të Interit: Romën, Monakon, Napolin... Një seri refuzimesh në emër të
dashurisë për ngjyrat zikaltër që është shuar vetëm në këto momente. Ndërkohë, Marota dhe Vanda vazhdojnë kontaktet dhe gjatë ditëve të fundit të merkatos do të përpiqen të negociojnë për të gjetur një zgjidhje që do të kënaqte të dyja palët. Fillimisht, administratori
do të përpiqet t'i zgjasë kontratën Mauros që skadon në 2021-shin për ta huazuar më pas jashtë Italisë, me destinacion PSG-në ose Atletikon, për të mos ia shitur Juves. Edhe pse, kampionët e Serisë A janë i vetmi destinacion që Mauro ka në kokë.