Asani nuk e pranon ndërrimin, Trashi: Jemi shumë nervozë
Mesfushori flet pa doreza: T'i thërrasim mendjes
Pak tifozë për një ekip kampion, Ler da që tërbohet me arbitrat pas kartonit të kuq të Solomonit dhe Asani që nuk e pranon zëvendësimin dhe shfryn në stol pas daljes nga fusha. Jo vetëm këto, por janë disa pikantet që "Panorama Sport" ju sjell për sfidën Partizani-Flamurtari. Edhe pse ndeshja e parë në shtëpi, në stadium nuk kishte më shumë se 1200 tifozë, një shifër mjaft e ulët, aq më tepër që skuadra e kuqe njihet për mbështetjen popullore që ka në vend.
LERDA - "Si ka mundësi të nxjerrësh të kuq, jeni në vete?!" Në momentin që arbitri Blerim Ziri ndëshkon me karton të kuq sulmuesin Solomon, trajneri i të kuqve, Franko Lerda, i kërkon llogari arbitrit të katërt, Cjapi. Ai shfryn për disa minuta, ndërsa në fund të ndeshjes, shfaq edhe më tepër nervozizëm. Menjëherë pas vërshëllimës së arbitrit, italiani ikën në dhomat e zhveshjes nxitimthi dhe shumë i nevrikosur. Ndërkohë, lojtarët në këtë
moment shkuan për të përshëndetur tifozët. Pas pak minutash Lerda i priti në dhomat e zhveshjes dhe zhvilloi një analizë, ku kritikat ishin të shumta.
ASANI - Në minutën e 69-të, Lerda hodhi në fushë Braunin, ndërsa tabela elektronike tregonte për të dalë nga fusha Jasir Asanin. Ky i fundit, menjëherë sapo shikon numrin në tabelë, habitet dhe kërkon shpjegime nga pankina. Më pas ecën dalëngadalë dhe i jep dorën Lerdës, por më pas shfryn kur shkon në stol. Fillimisht i kërkon llogari ndihmësit të italianit, Dritan Mehmetit, se pse doli nga fusha në këtë moment. Pjesëtarët e stafit të kuq mundohen ta qetësojnë lojtarin, i cili është dukshëm i nervozuar dhe i bindur se nuk e meritonte këtë zëvendësim.
BITRI - Mbrojtësi beratas i Partizanit, Eneo Bitri, bën portierin dhe shpëton një nga kamerat e transmetimit direkt të "SuperSportit". Një top i dalë në vijën anësore po i drejtohej kamerës, por pranë saj hidhet si portier dhe e kap Bitri. Në këtë mënyrë shmang goditjen e saj.
VATNIKAJ - Gjatë ndërrimit të Jurgen Vatnikajt me Kreshnik Nebihin, tabela elektronike e Flamurtarit bllokohet. Ndërkohë, në këtë moment vjen në ndihmë menaxheri i Partizanit,
Ildi Dajlani, i cili jep gjyqtarit të katërt, Cjapi, tabelën elektronike që ka klubi i kuq. Më pas zëvendësimi kryhet normalisht, edhe pse me vonesë.
DEKLARATA E TRASHIT
Lorenc Trashi pranon se në shtëpinë e kuqe ka nervozizëm. Në bisedën për "SuperSport" pas ndeshjes, lojtari i krahut të majtë foli pa doreza, duke filluar nga ndeshja me Flamurtarin, situata që po kalon skuadra dhe skema e ndryshuar. "E nisëm lojën shumë mirë, shënuam të parët dhe menduam se gjithçka do të shkonte sipas parashikimeve. Më pas kartoni i kuq na
prishi çdo ekuilibër dhe Flamurtari na vuri në vështirësi deri në fund", tha fillimisht Trashi, për t'u futur direkt në temë. "Pas çdo ndeshjeje mblidhemi dhe diskutojmë për episodet e lojës dhe rastet e pakta apo edhe kur i kemi dhe i shpërdorojmë, siç na ndodhi në Gjirokastër. Këtë herë e shfrytëzuam rastin që patëm me Solomonin, por duhet t'i thërrasim mendjes për vazhdimësinë, si unë, trajneri dhe të gjithë lojtarët. Nuk jemi të qetë, jemi shumë nervozë dhe kjo na bën të mos dalim në lojën tonë. Sistemi i lojës? Unë personalisht ndihem mirë me të dyja skemat, edhe pse me 35-2 luaj më shumë në sulm.
Jo se nuk mbroj shumë, por më pëlqen pjesa sulmuese. Ana negative e kësaj skeme është që duhet të mbrosh dhe sulmosh në komplet linjën. Ndoshta unë përshtatem, por me 3-5-2 është pak e vështirë. Këtë skemë do trajneri dhe ne duhet të përshtatemi. Në sezonin e kaluar ishim më të qetë, edhe pse kampionatin e nisëm me humbje. Tashmë u vendosëm pak në tension, por duhet të kuptojmë se ka pasur shumë ndryshime dhe këto janë gjëra normale dhe që mund të ndodhin në një skuadër. Duhet të jemi shumë të kujdesshëm në ndeshjet e tjera dhe mbi të gjitha të qetë", theksoi titullari i Partizanit.