Bylis i çmendur, leksion me tripletë Skënderbeut
Bardhekuqtë zhgënjejnë në Korçë, humbasin edhe kreun
Bylisi “shfryn” Skënderbeun në mes të Korçës. Ballshiotët e rikthyer këtë sezon në elitë kanë mposhtur në shifrat 0-3 bardhekuqtë. Një humbje që djeg dhe sidomos pas dy fitoreve në start. Një gol i shpejtë i Peposhit dhe më pas Guindo kanë sjellë qetësinë që në pjesën e parë për miqtë, ndërsa në të dytën ka “vulosur” gjithçka gardiani Hidi nga pika e bardhë e penalltisë. Skuadra e Ilir Dajës bëri shumë pak për të shënuar minimalisht një gol e jo më për të tentuar përmbysjen. PJESA E PARË
Korçarët e nisin me ritëm dhe sapo kishte hyrë e 2-ta minutë, Gripshi shmang bukur Peposhin në të djathtë dhe kombinohet me Meksin, ky i fundit sheh të lirë Oto Xhonin në pozicion perfekt dhe e shërben. Sulmuesi gjuan, por Hidi bllokon rrezikun. E megjithatë, “vrulli” zgjat shumë pak. Sulmi i shpejtë i Skënderbeut ngacmon Bylisin, që shton presionin. E megjithatë, përpjekjet e miqve shpërblehen në të 11-ën minutë. Murataj driblon bukur Pëllumbin pranë këndores dhe hedh një top perfekt për Peposhin, i cili pa u menduar dy herë gjuan me të djathtën dhe mposht Koliçin. Skënderbeu përgjigjet me disa goditje nga distanca, por më kot. Bylisi është kërkues, mbrohet mirë dhe shfaqet rrezikshëm në kundërsulm. Dhe në të 35-ën mund të dyfishonin, nëse ajo gjuajtje potente e Guindos nga 20 metra do të përfundonte pak centimetra më poshtë. Presingu i miqve shtohet dhe në të 45-ën, Qardaku, pasi lëviz bukur në hyrje të zonës, vë në provë reflekset e Koliçit. Portieri edhe pse grushton ia çon topin aty ku duhet Guindosë. Sulmuesi këtë herë nuk fal, zhytet me kokë dhe çon ekipin e tij në dhomat e zhveshjes me rezultatin 0-2.
PJESA E DYTË
Ilir Daja nuk ndryshon asgjë, por rifut ekipin në fushë me idenë e qartë për të përmbysur. E megjithatë, ajo përpjekje e Bregut është shumë pak për të sjellë barazimin. Bylisi nga ana tjetër, në çdo mundësi që i vjen mundohet ta shfrytëzojë dhe në të 58-ën fusin në panik Skënderbeun, aq sa shkaktojnë penallti. Guindo futet në zonë pas topit të marrë nga Murataj dhe Koliçi e ndal. Jepet 11metërsh, por pas kontestimeve vendimi çuditërisht zhbëhet,
ndonëse kontakti ishte. Gjithsesi, as 3 minuta dhe ka tjetër penallti. Top i larguar nga Turtulli dhe Guindo merr kontrollin. Me t’u futur në zonë, pengohet pas shpine prej Pollozhanit. E merr përsipër portieri Hidi ekzekutimin dhe e majta e tij nuk ndalet
prej homologut të tij. Skënderbeu merr goditje fatale, ndërsa Bylisi është i qetë, mbrohet mirë dhe qarkullon mirë topin. Përpjekjet e bardhekuqve janë të dëshpëruara. Ka dy raste Bregu, por si nga goditja e dënimit ashtu edhe në aksion nuk ka shënjestër.
Ballshiotët janë të etur dhe ndonëse i kryen të tria zëvendësimet, vazhdojnë të bombardojnë portën e vendësve, por mendon Koliçi që t’i thotë “jo” golit të 4-t pas gjuajtjes së Turabov, ndërsa Skënderbeu do të shfrytëzojë pauzën për të mbledhur veten.